ادارتی تجزیہ
آئین کی 27ویں آئینی ترمیم چند دنوں میں پارلیمنٹ میں پیش کیے جانے کا امکان ہے۔ لیکن افسوسناک امر یہ ہے کہ اس اہم معاملے پر ایک حقیقی قومی مکالمہ مفقود ہے — ایسا مکالمہ جس میں صرف سیاست دان ہی نہیں بلکہ عوام بھی شامل ہوں، کیونکہ آئین کی اصل طاقت عوام کی اجتماعی مرضی سے جنم لیتی ہے۔ آئینِ پاکستان ملک کا اعلیٰ ترین قانون ہے، جو طاقت کی تقسیم، شہریوں کے حقوق اور وفاق کی بنیاد کو طے کرتا ہے۔ اس میں کسی بھی ترمیم کی بنیاد محض پارلیمانی اختیار پر نہیں بلکہ قومی مشاورت اور عوامی رضامندی پر ہونی چاہیے۔
پاکستان جیسے پیچیدہ وفاقی نظام میں آئینی اصلاح محض قانون سازی کا عمل نہیں بلکہ وفاق اور صوبوں کے درمیان تعلقات کی نئی تشکیل ہے۔ اسی وجہ سے آئینی ترامیم کے لیے وسیع تر قومی اتفاق رائے ضروری ہوتا ہے۔ بدقسمتی سے موجودہ نظام میں آئین میں ترمیم کا اختیار صرف قومی پارلیمنٹ کے پاس ہے، جب کہ صوبائی اسمبلیوں کو اس عمل میں کوئی باضابطہ کردار حاصل نہیں۔ یہ ایک سنگین ساختی کمزوری ہے۔
ایک حقیقی وفاقی جمہوریت کا تقاضا ہے کہ وفاق کے تمام اکائیوں کو ان فیصلوں میں بامعنی کردار دیا جائے جو خود وفاق کی نوعیت کو تبدیل کرتے ہیں۔ صوبائی اسمبلیاں، جو متنوع سیاسی و ثقافتی شناختوں کی نمائندگی کرتی ہیں، ان معاملات میں محض تماشائی نہیں بن سکتیں۔ اگر وفاقیت کی روح کو زندہ رکھنا ہے تو ان اسمبلیوں — اور ان کے ذریعے عوام — سے مشاورت لازمی ہونی چاہیے۔
بعض ناقدین کا خیال ہے کہ صوبائی اسمبلیاں سیاسی دباؤ میں ہوتی ہیں اور عوامی رائے کی حقیقی نمائندہ نہیں۔ یہ اعتراض درست ہوسکتا ہے، لیکن اس بنیاد پر ان کی شرکت کو مکمل طور پر نظرانداز کرنا درست نہیں۔ حل اس میں ہے کہ نمائندہ جمہوریت کو مضبوط بنایا جائے، نہ کہ وفاقی شرکت کو کمزور کیا جائے۔ جمہوریت کا حسن ہی یہی ہے کہ اختلافِ رائے کے بعد اتفاقِ رائے پیدا کیا جائے۔ اگر آئینی فیصلوں سے صوبوں کی آواز خارج کر دی جائے تو احساسِ محرومی اور مرکزیت کے خلاف بے چینی میں اضافہ ہوتا ہے — اور یہ وفاقیت کی روح کے منافی ہے۔
اسی طرح عوامی ریفرنڈم کا تصور بھی اہم ہے۔ آئین خود یہ اختیار دیتا ہے، لہٰذا کسی بڑے قومی معاملے پر اس پر غور کرنے میں کوئی حرج نہیں۔ جب کوئی ترمیم ریاست کی بنیادی ساخت کو متاثر کرے، جیسا کہ 27ویں ترمیم میں کہا جا رہا ہے، تو عوام کا براہِ راست مشورہ ناگزیر ہو جاتا ہے۔ عوامی ریفرنڈم، پارلیمانی بحث اور عوامی سماعتوں کے ساتھ مل کر آئینی عمل کو جمہوری جواز فراہم کر سکتا ہے۔
آئین صرف قانونی دستاویز نہیں بلکہ ریاست اور عوام کے درمیان ایک زندہ معاہدہ ہے۔ اس میں ترمیم کرنا محض بل پاس کرنے جیسا نہیں بلکہ اداروں کی تشکیل، اختیارات کی تقسیم اور سیاسی توازن کو بدلنے کے مترادف ہے۔ ایسے عمل میں جلد بازی خطرناک ثابت ہو سکتی ہے۔ اس کے لیے سوچ بچار، مشاورت اور عوامی شمولیت ضروری ہے۔
قومی مکالمہ کوئی رسمی کارروائی نہیں بلکہ آئینی جواز کا بنیادی جزو ہے۔ ایک صحت مند وفاق اپنے اجزائے ترکیبی کے درمیان مسلسل مکالمے سے پھلتا پھولتا ہے۔ جب قوانین خفیہ کمروں میں عوامی شرکت کے بغیر بدلے جاتے ہیں، تو ان کی قانونی حیثیت شروع ہی سے مشکوک ہو جاتی ہے۔ آئین سازوں نے پاکستان کے لیے ایک شراکتی جمہوریت کا تصور کیا تھا — ایسا نظام جو شمولیت سے مضبوط ہو، مسلط کرنے سے نہیں۔
لہٰذا 27ویں ترمیم پر پیش رفت سے قبل ضروری ہے کہ قومی قیادت اس عمل کو کھلے مباحثے کے لیے پیش کرے۔ صوبائی اسمبلیوں میں بیک وقت بحثیں ہوں، جامعات اور تھنک ٹینکس علمی مکالمے کا اہتمام کریں، اور میڈیا عوامی آگاہی میں کردار ادا کرے۔ حکومت چاہے تو آئینی نظرثانی کمیشن تشکیل دے جس میں جج، ماہرینِ قانون، صوبائی نمائندے اور اسکالرز شامل ہوں تاکہ ترمیم کو وفاقی اصولوں کے تناظر میں پرکھا جا سکے۔
آئینی تسلسل جبر سے نہیں بلکہ اتفاقِ رائے سے قائم رہتا ہے۔ اگر ریاست وفاقی توازن میں تبدیلی یا ادارہ جاتی اختیارات میں ردوبدل چاہتی ہے تو اسے قومی اتفاقِ رائے کے ساتھ آگے بڑھنا ہوگا۔ پاکستان کی آئینی تاریخ میں جلد بازی، ذاتی مفاد اور غیر شفاف ترامیم کے اثرات پہلے ہی بہت دیکھے جا چکے ہیں۔ اب وقت ہے کہ یہ سلسلہ ختم ہو — آئین کی اصلاح سوچ سمجھ کر، مکالمے کے ذریعے اور جمہوری اصولوں پر ہونی چاہیے۔
بالآخر، 27ویں ترمیم یا کوئی بھی ایسی آئینی تبدیلی جو وفاقی ڈھانچے کو متاثر کرتی ہو، اسے عوامی تائید حاصل ہونی چاہیے۔ آئین ریاست کی بنیاد اور معاشرے کا اخلاقی رہنما ہے۔ اسے بدلنے کے لیے محض پارلیمانی اکثریت نہیں بلکہ ہر صوبے، ہر شہری اور ہر آواز کا احترام لازم ہے۔
