امریکی صدر ڈونلڈ ٹرمپ نے ایک مرتبہ پھر یہ دعویٰ کیا ہے کہ رواں سال مئی میں پاکستان اور بھارت کے درمیان ہونے والی مختصر فوجی جھڑپ کے دوران سات نئے اور جدید جنگی طیارے تباہ ہوئے تھے۔
بین الاقوامی میڈیا رپورٹس کے مطابق، جاپان کے دورے کے موقع پر کاروباری رہنماؤں سے عشائیے میں خطاب کرتے ہوئے ٹرمپ نے کہا کہ ان کی حکومت کی جانب سے مختلف ممالک پر عائد کیے گئے محصولات (ٹیرِف) نے کئی ممکنہ جنگوں کو روکنے میں اہم کردار ادا کیا۔
انہوں نے مثال دیتے ہوئے کہا کہ بھارت اور پاکستان کے درمیان صورتحال کشیدہ تھی، دونوں ممالک ایک دوسرے کے مقابل آگئے تھے، اور اس دوران سات خوبصورت طیارے مار گرائے گئے۔ ٹرمپ نے مزید کہا کہ انہوں نے بھارتی وزیرِ اعظم نریندر مودی، پاکستانی وزیرِ اعظم شہباز شریف اور فیلڈ مارشل عاصم منیر کو متنبہ کیا تھا
کہ اگر دونوں ممالک کے درمیان جنگ چھڑی تو امریکا کسی بھی قسم کا تجارتی معاہدہ نہیں کرے گا۔ ان کے مطابق، یہ پیغام دینے کے صرف 24 گھنٹے بعد ہی دونوں ممالک کے درمیان تنازع ختم ہو گیا۔ واضح رہے کہ مئی میں ہونے والی جھڑپ کے بعد پاکستان نے دعویٰ کیا تھا کہ اس نے بھارت کے چھ جنگی طیارے مار گرائے ہیں، جن میں رافیل بھی شامل تھا، تاہم بھارت نے اس دعوے کو تسلیم کرنے سے انکار کر دیا تھا۔
