امریکی صدر ڈونلڈ ٹرمپ نے ایران کے ساتھ جاری کشیدگی کے پیش نظر ایک بار پھر سخت تنبیہ کی ہے اور کہا ہے کہ اگر صورتحال غیر متوقع طور پر بگڑی تو ایران پر پہلے سے زیادہ بڑے اور شدید حملے کیے جائیں گے۔
سوشل میڈیا پر جاری بیان میں ٹرمپ نے واضح کیا کہ کسی بھی ممکنہ معاہدے تک امریکی بحری جہاز، لڑاکا طیارے اور فوجی اہلکار ایران کے اطراف تعینات رہیں گے تاکہ ہنگامی حالات میں فوری کارروائی کی جا سکے۔ انہوں نے کہا کہ اگر حالات خراب ہوئے تو امریکا دوبارہ کارروائی کرنے سے نہیں چوکے گا، اور اس بار حملے پہلے سے زیادہ طاقتور ہوں گے۔
صدر ٹرمپ نے مزید کہا کہ ایران کو جوہری ہتھیار حاصل کرنے کی اجازت ہرگز نہیں دی جائے گی اور امریکی فوج ہر وقت مکمل طور پر تیار اور اپنی آئندہ کامیابی کے لیے پُرعزم ہے۔
ماہرین کا کہنا ہے کہ ٹرمپ کے اس بیان سے خطے میں کشیدگی میں اضافہ ہو سکتا ہے اور یہ جاری امن کوششوں پر منفی اثر ڈال سکتا ہے، جس سے صورتحال مزید پیچیدہ ہونے کا خطرہ ہے۔
