امریکی صدر ڈونلڈ ٹرمپ نے بھارت کے ساتھ ایک نئی اور جامع تجارتی ڈیل کے آغاز کا اعلان کرتے ہوئے کہا ہے کہ یہ معاہدہ ماضی کے تمام معاہدوں سے مختلف، زیادہ مؤثر اور طویل المدت شراکت کا آغاز ثابت ہوگا۔
اوول آفس میں بھارت میں نامزد امریکی ایلچی سرجیو گور کی حلف برداری کی تقریب کے موقع پر صحافیوں سے گفتگو کرتے ہوئے ٹرمپ نے کہا کہ “ہم بھارت کے ساتھ پہلے سے زیادہ قریب آ رہے ہیں۔” ان کے مطابق، یہ ڈیل دونوں ممالک کے درمیان اقتصادی، تجارتی اور سلامتی کے تعلقات کو نئی سطح پر لے جائے گی، جس کا مقصد نہ صرف امریکی توانائی کی برآمدات میں اضافہ ہے بلکہ سرمایہ کاری، دفاعی صنعتوں اور ٹیکنالوجی کے تبادلے کو بھی فروغ دینا ہے۔
ٹرمپ نے کہا کہ نئی ڈیل سے امریکہ اور بھارت کے درمیان تعلقات کو عالمی استحکام، انسداد دہشت گردی اور خطے میں امن کے فروغ کے تناظر میں مزید مضبوط بنایا جائے گا۔ انہوں نے اس بات پر زور دیا کہ بھارت بحرِ ہند کے خطے میں امریکہ کا ایک اہم اتحادی ہے، اور یہ ڈیل دونوں ممالک کے عوام کے مفاد میں ثابت ہوگی۔
مزید برآں، ٹرمپ نے مشرقِ وسطیٰ کی صورتِ حال پر بات کرتے ہوئے کہا کہ “ہم شام کے ساتھ تعلقات بہتر بنانے کی کوشش کر رہے ہیں۔ ترکی کے صدر اردوان اور شام کے صدر کے درمیان روابط مثبت ہیں، اور امریکہ اسرائیل کے ساتھ مل کر خطے میں استحکام کے لیے کام کر رہا ہے۔”
امریکی صدر کے اس بیان کو عالمی ماہرین نے امریکہ کی خارجہ پالیسی میں بھارت کی بڑھتی ہوئی اہمیت اور ایشیا میں چین کے بڑھتے اثرورسوخ کے مقابلے کے طور پر دیکھا ہے، جس سے دونوں ممالک کے تعلقات ایک نئی تزویراتی جہت اختیار کر سکتے ہیں۔
