امریکی صدر ڈونلڈ ٹرمپ نے اتوار کے روز سعودی عرب، ترکیہ اور پاکستان کے درمیان حال ہی میں طے پانے والے دفاعی معاہدے پر خوشی کا اظہار کیا۔
ٹرمپ نے سماجی رابطے کے پلیٹ فارم ٹروتھ سوشل پر لکھا، ’’مجھے بہت خوشی ہے کہ سعودی عرب، ترکیہ اور پاکستان نے حال ہی میں بالآخر مکہ مشترکہ دفاعی معاہدے پر دستخط کر دیے ہیں۔‘‘ انہوں نے مزید کہا کہ یہ معاہدہ ظاہر کرتا ہے کہ مشرق وسطیٰ کس طرح متحد ہو رہا ہے اور ممالک آخرکار زیادہ مؤثر انداز میں اپنے دفاع کے قابل ہو سکیں گے۔ انہوں نے اسے ’’ایک بڑا، جرات مندانہ اور اہم پہلا قدم‘‘ قرار دیا۔
سات اگست کو طے پانے والا یہ سہ فریقی معاہدہ ایسے وقت میں سامنے آیا ہے جب امریکا اور ایران کے درمیان جنگ جاری ہے اور خطے میں تشدد پھیل چکا ہے، جس میں ایران کے حمایت یافتہ حوثی باغیوں کے حملے بھی شامل ہیں۔
پاکستان کی وزارتِ خارجہ نے کہا ہے کہ معاہدے کے تحت کسی بھی رکن ملک پر حملے کو تمام رکن ممالک پر حملہ تصور کیا جائے گا۔ وزارت نے اسے ’’اجتماعی بازدار قوت کو مضبوط بنانے‘‘ کے مقصد سے قرار دیا ہے۔ معاہدے میں تینوں ممالک نے اجتماعی سلامتی کو مضبوط بنانے اور خطے سمیت وسیع تر دنیا میں امن، سلامتی اور استحکام کے فروغ کے عزم کا اظہار کیا ہے۔ تینوں ممالک نے ایران اور امریکا کے درمیان تنازع کے حل کی کوششوں میں بھی حصہ لینے پر اتفاق کیا ہے۔
