امریکی صدر ڈونلڈ ٹرمپ نے وضاحت کی ہے کہ قطر پر حملے کا فیصلہ ان کا نہیں بلکہ اسرائیلی وزیراعظم نیتن یاہو کا تھا۔ ٹرمپ کا کہنا ہے کہ قطر پر یکطرفہ بمباری نہ تو امریکہ اور نہ ہی اسرائیل کے مفادات کو آگے بڑھاتی ہے۔
دوسری جانب قطری وزیراعظم شیخ محمد بن عبدالرحمٰن الثانی نے دوحا میں ایک پریس کانفرنس کے دوران اسرائیلی حملے کو ’’ریاستی دہشت گردی‘‘ قرار دیتے ہوئے اعلان کیا کہ قطر اپنے دفاع اور جواب دینے کا حق محفوظ رکھتا ہے۔
ٹرمپ نے مزید کہا کہ انہوں نے مارکو روبیو کو ہدایت دی ہے کہ وہ قطر کے ساتھ دفاعی تعاون کے معاہدے کو حتمی شکل دیں۔ ان کے مطابق قطر ایک خودمختار ریاست ہے اور امریکہ کا قریبی اتحادی ہے، جو واشنگٹن کے ساتھ مل کر خطے میں امن قائم کرنے کی کوشش کر رہا ہے۔
امریکی صدر کا یہ بھی کہنا تھا کہ حماس نے غزہ کے عوام کی مشکلات اور بدحالی سے فائدہ اٹھایا ہے۔
