راولپنڈی — چیف آف ڈیفنس فورسز اور چیف آف آرمی اسٹاف فیلڈ مارشل عاصم منیر نے کہا ہے کہ پاکستان اور چین کی دوستی “منفرد، آزمودہ اور وقت کی ہر کسوٹی پر پوری اترنے والی دوستی ہے، جو بدلتے ہوئے علاقائی اور عالمی چیلنجز کے باوجود ہمیشہ ثابت قدم رہی ہے۔”
پاک فوج کے شعبہ تعلقات عامہ (آئی ایس پی آر) کے مطابق، فیلڈ مارشل عاصم منیر نے یہ بات جنرل ہیڈکوارٹرز (جی ایچ کیو) راولپنڈی میں پیپلز لبریشن آرمی (پی ایل اے) کے قیام کی 99ویں سالگرہ کے موقع پر منعقدہ تقریب سے خطاب کرتے ہوئے کہی۔
تقریب میں پاکستان میں چین کے سفیر جیانگ زائی ڈونگ مہمانِ خصوصی تھے، جبکہ چین کے دفاعی اتاشی میجر جنرل وانگ ژونگ، چینی سفارت خانے کے حکام اور پاکستان کی تینوں مسلح افواج کے سینئر افسران بھی شریک ہوئے۔
آئی ایس پی آر کے مطابق، فیلڈ مارشل عاصم منیر نے چینی وفد کا خیرمقدم کرتے ہوئے پیپلز لبریشن آرمی کو اس کی سالگرہ پر مبارکباد پیش کی اور چین کے دفاع، قومی ترقی اور عالمی امن و سلامتی کے لیے اس کی نمایاں خدمات کو خراجِ تحسین پیش کیا۔
انہوں نے کہا کہ پاکستان اور چین کے تعلقات باہمی اعتماد، غیر متزلزل تعاون اور مشترکہ اسٹریٹجک مفادات پر مبنی ہیں۔ دونوں ممالک کی مسلح افواج حقیقی شراکت دار ہیں اور خطے میں امن، استحکام اور مشترکہ مفادات کے تحفظ کے لیے مل کر کام کرتی رہیں گی۔
اس موقع پر چینی سفیر جیانگ زائی ڈونگ نے تقریب کی میزبانی پر فیلڈ مارشل عاصم منیر کا شکریہ ادا کیا اور دہشت گردی کے خلاف جنگ میں پاکستان کی مسلح افواج کی قربانیوں کو سراہا۔ انہوں نے پاکستان کی مسلسل حمایت اور دونوں ممالک کے درمیان ہر موسم میں قائم رہنے والی اسٹریٹجک شراکت داری کو مزید مضبوط بنانے کے عزم کا اعادہ بھی کیا۔
گزشتہ سال بھی جی ایچ کیو میں اسی نوعیت کی تقریب سے خطاب کرتے ہوئے فیلڈ مارشل عاصم منیر نے اس بات پر زور دیا تھا کہ پاکستان اور چین کی دیرینہ شراکت داری خطے کے امن اور استحکام میں اہم کردار ادا کرتی رہے گی۔
پاکستان اور چین کے درمیان تعلقات کئی دہائیوں پر محیط باہمی اعتماد، اقتصادی تعاون اور علاقائی روابط پر استوار ہیں۔ تجارت، توانائی، دفاع اور بنیادی ڈھانچے سمیت مختلف شعبوں میں دونوں ممالک کا تعاون مسلسل فروغ پا رہا ہے، جبکہ چین پاکستان اقتصادی راہداری (سی پیک) اس شراکت داری کی نمایاں علامت سمجھی جاتی ہے۔
حالیہ مہینوں میں بھی دونوں ممالک کے تعلقات مزید مضبوط ہوئے ہیں۔ گزشتہ ماہ دواسازی کے شعبے سے متعلق ایک کانفرنس میں دونوں ممالک کی کمپنیوں کے درمیان 85 کروڑ ڈالر مالیت کے معاہدوں پر دستخط کیے گئے، جبکہ ایک روز قبل وفاقی وزیر داخلہ محسن نقوی نے چین کی نیشنل امیگریشن ایڈمنسٹریشن کے وفد سے ملاقات کی، جس میں امیگریشن، سرحدی انتظام اور ادارہ جاتی تعاون کو مزید فروغ دینے پر اتفاق کیا گیا۔
