ایک تحقیق میں معلوم ہوا ہے کہ فضائی آلودگی کیڑے مکوڑوں کے غذا ڈھونڈنے کی صلاحیت کو کمزور کرتے ہوئے عالمی سطح پر ان کی تعداد میں واضح کمی لاسکتی ہے۔
یونیورسٹی آف میل برن، بیجنگ فاریسٹری یونیورسٹی اور یونیورسٹی آف کیلیفورنیا ڈیوِس کے محققین کی ٹیم کو ایک تحقیق میں معلوم ہوا ہے کہ صنعتوں، ٹرانسپورٹ، جنگلات کی آگ اور فضائی آلودگی کے دیگر ذرائع سے خارج ہونے والے پارٹیکولیٹ میٹر (آلودہ ذرات) کیڑے مکوڑوں کے انٹنا کو آلودہ کر دیتے ہیں اور ان کی غذا ڈھونڈنے کی صلاحیت کو کمزور کر دیتے ہیں۔
نیچر کمیونی کیشن میں شائع ہونے والی تحقیق کے شریک مصنف اور یونیورسٹی آف میل برن سے تعلق رکھنے والے پروفیسر مارک ایلگر کے مطابق یہ تحقیق انسانوں کو کیڑے مکوڑوں کی آبادی کو لاحق واضح خطرے کے متعلق خبردار کرتی ہے۔
پروفیسر مارک کا کہنا تھا کہ ہم یہ بات جانتے ہیں کہ پارٹیکولیٹ میٹر حیاتیات بشمول کیڑے مکوڑوں کی صحت کو متاثر کرتے ہیں۔ یہ تحقیق بتاتی ہے کہ فضائی آلودگی کیڑے مکوڑوں کے لیے غذا ڈھونڈنے میں انتہائی ضروری سونگھنے کی صلاحیت کو بھی کمزور کردیتی ہے جس کے نتیجے میں ان کی آبادی میں کمی آسکتی ہے۔
انہوں نے کہا کہ متعدد کیڑے پودوں کی زیرگی کے عمل میں ، بشمول ان تمام فصلوں کے جن پر ہمارا غذا کے لیے انحصار ہوتا ہے، اور گلنے والے مواد کو ختم کرنے اور اجزاء کو ری سائیکل کرنے میں اہم کردار ادا کرتے ہیں۔
آسٹریلوی ریاست وِکٹوریا کے دیہی علاقوں میں جنگلات میں لگنے والی آگ سے متاثرہ جگہوں میں جاری تحقیق میں مختلف کیڑوں کے انٹینا دھوئیں کے ذرات سے آلودہ پائے گئے، چاہے وہ آگ لگنے والی جگہوں سے فاصلے پر ہی کیوں نہ ہوں۔
کیڑوں کے انٹینا میں سونگھنے کے ریس یپٹرز ہوتے ہیں جو غذائی ذرائع سے خارج ہونے والے مالیکول یا انڈے دینے کے لیے مناسب جگہ کی نشان دہی کرتے ہیں۔ اگر کسی کیڑے کا انٹینا پارٹیکولیٹ میٹر سے ڈھک جاتا ہے تو کیڑے کی صلاحیت اور ہوا میں موجود سونگھے جانے والے مالیکول کے درمیان رکاوٹ پیدا ہوجاتی ہے۔
