شہباز شریف پاکستان کے وزیراعظم منتخب ہو گئے۔
نتائج کا اعلان کرتے ہوئے اسپیکر قومی اسمبلی سردار ایاز صادق نے کہا کہ مسلم لیگ ن اور اتحادی جماعتوں کے مشترکہ امیدوار شہباز شریف نے201ووٹ حاصل کیے۔ سنی اتحاد کونسل کے امیدوار عمر ایوب خان نے 92 ووٹ حاصل کیے۔
یہ دوسری مرتبہ ہے کہ شہباز شریف ملک کے وزیراعظم منتخب ہوئے ہیں۔
ایوان میں موجود بلوچستان نیشنل پارٹی (مینگل) کے سربراہ اختر مینگل نے ووٹنگ میں حصہ نہیں لیا۔شہباز شریف بعد ازاں اتحادی جماعتوں کے ڈیسک پر گئے اور ان سے اظہار تشکر کیا۔
سنی اتحاد کونسل کے امیدوار عمر ایوب خان نےاپنی حمایت کرنے پر اپنی پارٹی کے اراکین کا شکریہ ادا کیا۔
نومنتخب وزیراعظم محمد شہباز شریف نے موجودہ چیلنجز سے موثر انداز میں نمٹنے اور ملک کو ترقی و خوشحالی کی طرف لے جانے کے لیے اپوزیشن کو چارٹر آف ری کنسی لیشن کی دعوت دی ۔
قومی اسمبلی میں اپنی پہلی تقریر میں انہوں نے کہا کہ ان کی کوئی ذاتی انا نہیں ہے ۔انہوں نے کہا کہ اس سے قبل انہوں نے ملکی مفاد کے لیے چارٹر آف اکانومی تجویز کیا تھا۔
شہباز شریف نے کہا کہ عوام نے عام انتخابات میں منقسم مینڈیٹ دیا ہے اور انتخابی نتائج پر تحفظات رکھنے والوں کو مناسب فورمز سے رجوع کرنے کی ضرورت ہے۔
انہوں نے اس بات پر زور دیا کہ اجتماعی فیصلوں کے ذریعے ملک کی تقدیر بدلی جا سکتی ہے اور اسے خود انحصاری کی راہ پر گامزن کیا جا سکتا ہے۔
اپنی حکومت کی ترجیحات کو اجاگر کرتے ہوئے، منتخب وزیر اعظم نے مختلف شعبوں میں چیلنجز سے نمٹنے کے لیے منصوبوں اور اصلاحات کا اعلان کیا۔
معاشی چیلنجز کا ذکر کرتے ہوئے وزیراعظم نے نشاندہی کی کہ ملک 80 ہزار ارب روپے کے اندرونی اور بیرونی قرضوں کا مقروض ہے ۔
نو منتخب وزیراعظم نے کہا کہ رواں مالی سال کے دوران بارہ ہزار تین سو ارب روپے کی آمدن متوقع ہے۔ انہوں نے کہا کہ نیشنل فنانس کمیشن ایوارڈ کے تحت صوبوں میں وسائل کی تقسیم کے بعد وفاقی حکومت کے پاس سات ہزار تین سو ارب روپے رہ جائیں گے۔ انہوں نے کہا کہ سود کی ادائیگی کے لیے آٹھ ہزار ارب روپے درکار ہیں۔
شہباز شریف نے فیڈرل بورڈ آف ریونیو کو ہدایت کی کہ آئندہ دس روز میں زیر التواء ٹیکس ریفنڈز کو یقینی بنایا جائے۔ انہوں نے کہا کہ ان کی حکومت محصولات کو بڑھانے کے لیے ہر ممکن کوشش کرے گی جس سے مہنگائی میں کمی آئے گی اور روزگار کے مواقع پیدا ہوں گے۔
شہباز شریف نے کہا کہ ملک میں کاروبار اور سرمایہ کاری کے لیے سازگار ماحول پیدا کرنے کے لیے فرسودہ قوانین کو ختم کیا جائے گا۔ انہوں نے کہا کہ دوست ممالک کے تاجروں کو ویزا فری انٹری دی جائے گی۔ انہوں نے بینکوں کو ہدایت کی کہ وہ چھوٹے اور درمیانے درجے کے کاروباری اداروں کے فروغ کے لیے نوجوانوں کو قرضے بھی دیں۔ انہوں نے کہا کہ ون ونڈو کی سہولت کو یقینی بنا کر صوبائی حکومتوں کے تعاون سے ایکسپورٹ زونز کا نیٹ ورک پورے ملک میں پھیلایا جائے گا۔
وزیراعظم نے کہا کہ تجارتی راہداری کھول دی جائے گی۔ انہوں نے کہا کہ چین پاکستان اقتصادی راہداری کو چین کے تعاون سے آگے بڑھایا جائے گا جو کہ پاکستان کا قابل اعتماد دوست ہے۔
شہباز شریف نے بجلی کے نرخوں میں اضافے پر تشویش کا اظہار کرتے ہوئے کہا کہ پاور سیکٹر میں گردشی قرضہ دو ہزار تین سو ارب روپے تک جا پہنچا ہے۔ انہوں نے کہا کہ بجلی چوری کے خلاف کارروائی کی جائے گی۔
نو منتخب وزیراعظم نے کہا کہ وہ خود بجلی چوری اور ٹیکس چوری کے خلاف کارروائی کی نگرانی کریں گے۔ انہوں نے توانائی کمپنیوں کو ہدایت کی کہ وہ صارفین کو سستی بجلی فراہم کرنے کے لیے قابل تجدید توانائی کے منصوبوں کا جال بچھا دیں۔
زراعت کے شعبے میں اپنی حکومت کی ترجیحات کی نقاب کشائی کرتے ہوئے، منتخب وزیر اعظم نے کسانوں کو کھادوں پر براہ راست ریلیف فراہم کرنے کے عزم کا اظہار کیا۔ انہوں نے کہا کہ حکومت سولر ٹیوب ویل پروگرام شروع کرے گی اور پہلی بار کسانوں کو اعلیٰ معیار کے درآمدی بیج مفت فراہم کرنے کی کوشش کرے گی۔ انہوں نے کہا کہ خصوصی سرمایہ کاری سہولت کونسل کے تحت لائیو سٹاک فارمنگ کو فروغ دیا جائے گا۔
شہباز شریف نے کہا کہ صوبائی حکومتوں کے ساتھ مل کر موثر پبلک ٹرانسپورٹ سسٹم کا نیٹ ورک قائم کرنا ان کی حکومت کی ایک اور ترجیح ہوگی۔ انہوں نے کہا کہ عوام کو صحت کی بہتر سہولیات فراہم کرنے کے لیے وفاق اور صوبوں میں جدید ترین ہسپتال بنائے جائیں گے۔
وزیراعظم نے اپنے آخری دور حکومت میں سعودی عرب کی طرف سے دی جانے والی مالی معاونت کو سراہا۔ انہوں نے اعتراف کیا کہ سعودی عرب نے ہمیشہ مشکل وقت میں پاکستان کا ساتھ دیا ہے۔ اسی طرح متحدہ عرب امارات اور ترکی نے بھی مشکل وقت میں پاکستان کا ساتھ دیا ہے۔
مقبوضہ کشمیر میں معصوم فلسطینیوں کے خلاف اسرائیلی جارحیت اور بھارتی مظالم کی مذمت کرتے ہوئے نو منتخب وزیراعظم نے عالمی برادری پر زور دیا کہ وہ انسانیت کے خلاف ہونے والی بربریت پر خاموشی توڑے۔
Don’t forget to Subscribe our Youtube Channel & Press Bell Icon.
