ورلڈ نو ٹوبیکو ڈے ہر سال 31 مئی کو پوری دنیا میں منایا جاتا ہے۔ یہ دن عوام کو تمباکو کے استعمال کے خطرات، تمباکو کمپنیوں کے کاروباری طریقوں، عالمی ادارہ صحت (ڈبلیو ایچ او) تمباکو کے استعمال کے خلاف لڑنے کے لیے کیا کر رہا ہے، اور دنیا بھر کے لوگ اپنے حق کا دعویٰ کرنے کے لیے کیا کر سکتے ہیں کے بارے میں آگاہ کرتا ہے ۔
اقوام متحدہ کے رکن ممالک نے 1987 میں تمباکو نوشی کا عالمی دن منایا تاکہ تمباکوکے استعمال کی وجہ سے جو ا موات اور بیماریاں جنم لیتی ہیں اقوام عالم کی توجہ اس طرف مبذول کرائی جائے ۔1987 میں، ورلڈ ہیلتھ اسمبلی نے قرارداد ڈبلیو ایچ اے 40.38 منظور کی، جس میں 7 اپریل 1988 کو ”عالمی یوم تمباکو نوشی نہ کرنے کا دن“ قرار دیا گیا۔ 1988 میں، قرارداد ڈبلیو ایچ اے 42.19 منظور کی گئی، جس میں ہر سال 31 مئی کو تمباکو نوشی کا عالمی دن منانے کا مطالبہ کیا گیا۔اس دن کو منانے کا مقصد تمباکو نوسی کی وجہ سے آپ کی صحت کے منفی اثرات کی طرف توجہ دینا ہے ، جس کا شکار اس وقت پوری دنیا میں ہر سال 80 لاکھ سے زیادہ لوگ بنتے ہیں۔ اس دن کو پوری دنیا میں حکومتوں، صحت عامہ کی تنظیموں، تمباکو نوشی کرنے، کاشتکاروں اور تمباکو کی صنعت کی طرف سے جوش و خروش اور مزاحمت دونوں کے ساتھ منایا گیا ہے۔
پے درپے حکومتوں کی کوششوں کے باوجود، پاکستانی حکام کے لیے تمباکو کا استعمال صحت عامہ کا ایک اہم چیلنج بنا ہوا ہے۔ تمباکو کئی موذی بیماریوں کی وجہ بنتی ہے جیسےکہ کینسر، دل کی بیماریاں، ذیابیطس اور پھیپھڑوں کی مختلف بیماریاں – تمباکو کا استعمال موت کی مکمل طور پر قابل گریز وجہ ہے۔ پھر بھی، ناقابلِ دفاع وجوہات کی بناء پر، ہمارے حکام نے تمباکو کے استعمال کے پھیلاؤ کو کم کرنے اور شہریوں کی حوصلہ شکنی کے لیے کیے گئے اقدامات کے نفاذ کو کوئی خاطر خواہ ترجیح نہیں دی ہے۔ تمباکو کی صنعت کا ضابطہ انتہائی سست روی کا شکار ہے – یہاں تک کہ تمباکو بنانے والی کمپنیاں بھی اس بات کی مذمت کرتی ہیں کہ پاکستان میں تمباکو کی مصنوعات کی بلیک مارکیٹ کتنی آزادانہ طور پرکام کر رہی ہے۔ تمباکو کی مصنوعات کی فروخت کسی ذمہ دار نگرانی کے بغیر جاری رہتی ہے، یہاں تک کہ بچوں کو بھی اپنے پڑوس کے پان والی دکانوں سے سگریٹ بغیر کسی حجت کے مل جاتی ہے ۔ حالیہ برسوں میں تمباکو کی مصنوعات، خاص طور پر سگریٹ پر ٹیکسوں میں اضافہ دیکھا گیا ہے، لیکن کیا یہ واقعی ایک خاص طور پر کمزور آبادی کو ممکنہ طور پر اس مہلک عادت اختیار کرنے کی حوصلہ شکنی کے لیے کافی ہے؟ صحت کے حکام اپنی تشویش کا اظہار کئی دفعہ کر چکے ہیں یہ کافی نہیں ہے۔
اس سال کے شروع میں اسلام آباد میں ایک کانفرنس میں مقررین نے اس بات پر روشنی ڈالی کہ ملک میں تمباکو نوشی کرنے والوں کی تعداد 31 ملین تک پہنچ گئی ہے اور یہ کہ تمباکو سے پیدا ہونے والی بیماریوں کی وجہ سے روزانہ 466 شہری موت کے منہ میں جا رہے ہیں۔ کانفرنس میں جو سب سے زیادہ پریشان کن بات شیئر کی گئی وہ یہ تھی کہ ملک بھر میں ہر روز چھ سے پندرہ سال کی عمر کے تقریباً 1,200 بچے سگریٹ نوشی اختیار کر رہے ہیں۔ تمباکو سے پاک بچوں کی مہم کے سربراہ ملک عمران احمد کے مطابق، ہر سال، مہلک عادت قومی جی ڈی پی کا تقریباً 1.6 فیصد، یا 600 بلین روپے سے زیادہ کا نقصان کرتی ہے۔ عمران احمد کے مطابق، تمباکو پر ٹیکس اس تعداد کا صرف 20 فیصد ہے۔ تمباکو سے حاصل ہونے والی نئی مصنوعات کا پھیلاؤ بھی پاکستان کے صحت عامہ کے ماہرین کو شدید تشویش کا باعث بنا رہا ہے۔ مثال کے طور پر، نکوٹین کے پاؤچ، تمباکو نوشی نہ کرنے والوں کو اپنے استعمال کے عادی بنا سکتے ہیں، جس سے تمباکو کی دوسری مصنوعات کا دروازہ کھل جاتا ہے۔ سوال یہ ہے کہ کیا حکام اس پر کوئی توجہ دے رہے ہیں؟
