پیرس: فرانسیسی صدر ایمانوئل میکرون نے جون میں فلسطین کو ریاست کے طور پر تسلیم کرنے کا اعلان کر دیا۔
غیر ملکی خبر رساں ایجنسی کے مطابق فرانسیسی صدر ایمانوئل میکرون نے کہا ہے کہ ان کا مقصد اسرائیل فلسطین تنازع پر اقوام متحدہ کی کانفرنس میں اس اقدام کو حتمی شکل دینا ہے۔
انہوں نے کہا کہ ہمیں فلسطین کو ایک ریاست کی حیثیت سے تسلیم کرنے کی طرف بڑھنا چاہیے۔ اور ہم آنے والے مہینوں میں ایسا کریں گے۔
فرانسیسی صدر نے کہا کہ میں ایسا کسی کو خوش کرنے کے لیے نہیں کر رہا بلکہ ایسا کرنا ہی درست ہو گا۔
دوسری جانب فلسطینی حکام نے کہا ہے کہ فرانسیسی صدر کا یہ بیان فلسطینی عوام کے حقوق کے تحفظ اور دو ریاستی حل کے سلسلے میں درست سمت کی جانب ایک قدم ہے۔
