بین الاقوامی مالیاتی فنڈ (آئی ایم ایف) نے حکومتِ پاکستان کی وہ تجویز مسترد کر دی ہے جس کے تحت کرپٹو مائننگ، ڈیٹا سینٹرز اور توانائی استعمال کرنے والے صنعتی شعبوں کو سب سڈی کے ساتھ بجلی فراہم کی جانی تھی۔ آئی ایم ایف کے مطابق یہ اقدام توانائی کے شعبے میں مزید بگاڑ پیدا کرے گا اور مارکیٹ میں غیر متوازن صورتحال پیدا کرے گا۔
سینیٹ کی قائمہ کمیٹی برائے توانائی کو بریفنگ دیتے ہوئے سیکریٹری پاور ڈاکٹر فخرائے عالم نے بتایا کہ بجلی کے شعبے سے متعلق ہر بڑا فیصلہ آئی ایم ایف کی منظوری سے مشروط ہے۔ اُنہوں نے کہا کہ اگرچہ ملک میں اضافی بجلی موجود ہے، خاص طور پر سردیوں میں، مگر آئی ایم ایف نرخوں میں کسی بھی تبدیلی کو محتاط نظر سے دیکھتا ہے۔
گزشتہ سال نومبر میں حکومت نے تجویز دی تھی کہ مخصوص صنعتوں کو 22 سے 23 روپے فی یونٹ پر بجلی فراہم کی جائے، تاکہ اضافی بجلی کا استعمال بڑھایا جا سکے، تاہم آئی ایم ایف نے اس منصوبے کو رد کر دیا۔ ڈاکٹر فخرائے عالم نے کہا کہ حکومت اب بھی عالمی اداروں سے مشاورت کر رہی ہے اور حتمی فیصلہ زیرِ غور ہے۔
