وزیراعلیٰ خیبرپختونخوا علی امین گنڈاپور نے کالا باغ ڈیم کی تعمیر کی کھل کر حمایت کرتے ہوئے کہا ہے کہ یہ منصوبہ پاکستان کے ریاستی مفاد کے لیے ناگزیر ہے اور اس کے خلاف موجود اعتراضات کو بات چیت اور افہام و تفہیم کے ذریعے دور کیا جانا چاہیے۔ اسلام آباد میں پارٹی اجلاس کے بعد میڈیا سے گفتگو کرتے ہوئے ان کا کہنا تھا کہ قومی مفاد میں کسی منصوبے کو پیچھے نہیں دھکیلا جا سکتا، لہٰذا کالا باغ ڈیم پر قومی اتفاقِ رائے پیدا کرنا وقت کی اہم ضرورت ہے۔
علی امین گنڈاپور نے واضح کیا کہ خیبرپختونخوا اس منصوبے کے لیے اپنا حصہ ڈالنے کو تیار ہے، اور امید ہے کہ دیگر صوبے بھی اس میں تعاون کریں گے تاکہ یہ دیرینہ منصوبہ عملی شکل اختیار کر سکے۔ ان کا کہنا تھا کہ پاکستان میں بدقسمتی سے آبی ذخائر کی تعمیر پر خاطر خواہ توجہ نہیں دی گئی اور نہ ہی قدرتی آفات سے نمٹنے کے لیے مؤثر منصوبہ بندی کی گئی، جس کا نتیجہ یہ ہے کہ ہر سال بارشوں اور سیلابوں کے سبب ملک کے مختلف حصے تباہی کا سامنا کرتے ہیں۔
انہوں نے اس موقع پر افسوس کا اظہار کرتے ہوئے کہا کہ حالیہ بارشوں اور طغیانی کے نتیجے میں خیبرپختونخوا کے کئی شہر بری طرح متاثر ہوئے ہیں اور صرف صوبے میں ہی 490 قیمتی جانیں سیلابی ریلوں کی نذر ہوگئیں۔ ان کا کہنا تھا کہ اگر ماضی میں وقت پر ڈیم بنائے گئے ہوتے تو اس قدر بڑے پیمانے پر انسانی جانوں اور مالی وسائل کا نقصان نہ ہوتا۔ وزیراعلیٰ نے زور دیا کہ اب مزید تاخیر برداشت نہیں کی جا سکتی اور قومی سطح پر پانی کے ذخائر بنانے کے فیصلے کیے جائیں تاکہ ملک کے مستقبل کو محفوظ بنایا جا سکے۔
