نئی دہلی: بھارتی ریاست تامل ناڈو میں ایک سیاسی جلسے کے دوران بھگدڑ سے کم از کم 36 افراد جاں بحق ہوگئے، جن میں بچے بھی شامل ہیں۔ یہ افسوسناک واقعہ ہفتے کے روز کرور ضلع میں اداکار سے سیاستدان بننے والے وجے کے جلسے میں پیش آیا جہاں ہزاروں افراد جمع تھے۔
مقامی میڈیا کے مطابق جلسہ کئی گھنٹے تاخیر کا شکار ہوا، جس سے مجمع بے قابو ہوگیا۔ ٹی وی مناظر میں لوگوں کو بے ہوش ہوکر گرتے دیکھا گیا۔ ریاستی وزیر سنتھل بالاجی نے کہا کہ پچاس سے زائد زخمیوں کو اسپتال منتقل کیا گیا ہے۔
وزیر صحت ما سبرامنیم کے مطابق جاں بحق افراد میں 16 خواتین، 9 مرد اور 6 بچے شامل ہیں۔ وزیر اعلیٰ ایم کے اسٹالن نے لواحقین کو دس لاکھ روپے معاوضہ دینے اور واقعے کی تحقیقات کا اعلان کیا۔
اسپتال کے باہر لواحقین اپنے دکھ کا اظہار کر رہے تھے۔ ایک شخص نے کہا: “میرے بھائی کے دو بیٹے وہاں تھے۔ بڑا بیٹا جاں بحق ہوگیا، چھوٹا لاپتہ ہے۔ میری بھابھی آئی سی یو میں ہیں، میں کیا کروں؟”
وجے نے اپنے بیان میں کہا کہ ان کا دل ٹوٹ گیا ہے اور وہ ناقابلِ بیان دکھ میں ہیں۔ وزیر اعظم نریندر مودی نے اسے “انتہائی افسوسناک” قرار دیا۔ بھارت میں بڑے اجتماعات میں بھگدڑ کے واقعات عام ہیں اور رواں سال بھی کئی ایسے حادثے رونما ہو چکے ہیں۔
