وزیراعلیٰ خیبر پختونخوا سہیل خان آفریدی نے اعلان کیا ہے کہ وہ 7 دسمبر کو پشاور میں ایک بڑے عوامی جلسے کا انعقاد کریں گے، اور ساتھ ہی پشاور کی ترقی کے لیے 100 ارب روپے کے اہم ترقیاتی منصوبوں پر ایک گرینڈ میٹنگ بھی بلائی جائے گی۔
اس حوالے سے وزیراعلیٰ سہیل خان آفریدی کی زیر صدارت پشاور کے پارلیمنٹرینز کا اجلاس منعقد ہوا، جس میں موجودہ اور سابق اراکین اسمبلی کے ساتھ پشاور کی سینئر قیادت نے بھی بھرپور شرکت کی۔
وزیراعلیٰ سہیل آفریدی نے اجلاس میں کہا کہ بےاختیار لوگوں سے مذاکرات کا کوئی فائدہ نہیں، اس لیے پشاور کی ترقی کے لیے عملی اقدامات اٹھائے جائیں گے۔
اجلاس میں فیصلہ کیا گیا کہ 7 دسمبر کو پشاور میں عوامی جلسہ منعقد کیا جائے گا تاکہ شہریوں کے ساتھ براہِ راست رابطہ قائم کیا جا سکے اور ترقیاتی منصوبوں پر تفصیلی بات چیت ہو۔
وزیراعلیٰ نے اس موقع پر کہا کہ پشاور کی عظمتِ رفتہ کو بحال کرنا ہماری اولین ترجیح ہے، اور ترقیاتی منصوبوں کی رفتار میں اضافہ کیا جائے گا کیونکہ پشاور صوبے کا دارالحکومت اور ہمارا فخر ہے۔
انہوں نے مزید کہا کہ پشاور کے میگا پروجیکٹس کے نفاذ اور شہر کے درپیش مسائل کو ترجیحی بنیادوں پر حل کیا جائے گا تاکہ شہری سہولیات اور بنیادی ڈھانچے کی بہتری یقینی بنائی جا سکے۔
یہ اقدامات پشاور کی تاریخی اہمیت کو برقرار رکھنے اور شہری ترقی کے نئے دور کا آغاز کرنے کے لیے اٹھائے جا رہے ہیں۔
