پاکستان مسلم لیگ (ن) کے صدر اور سابق وزیراعظم نواز شریف نے کہا ہے کہ وفاقی حکومت کو گلگت بلتستان اور آزاد کشمیر کا این ایف سی میں حصہ خود دینا چاہیے، یہ مطالبہ ان علاقوں کو کرنے کی ضرورت نہیں پڑنی چاہیے۔
لاہور میں پارٹی کے رہنماؤں سے ملاقات کرتے ہوئے انہوں نے زور دیا کہ آئندہ انتخابات میں امیدواروں کا انتخاب مکمل میرٹ پر ہوگا۔ انہوں نے نشاندہی کی کہ آزاد کشمیر اور گلگت بلتستان میں مقامی سطح پر پارٹی اختلافات الیکشن میں نقصان کا سبب بنتے ہیں، اور آئندہ ایسی اندرونی لڑائیاں برداشت نہیں کی جائیں گی۔
نواز شریف نے کہا کہ موجودہ سیاسی فضا مسلم لیگ (ن) کے لیے موافق ہے، لیکن ٹکٹ کے امیدواروں میں اصل کارکنوں اور موقع پرست عناصر میں فرق رکھنا ضروری ہے۔
انہوں نے بتایا کہ مسلم لیگ (ن) نے ماضی میں گلگت بلتستان اور آزاد کشمیر میں بڑے ترقیاتی منصوبوں پر بھاری سرمایہ کاری کی ہے، جو ممکنہ این ایف سی حصے سے بھی زیادہ تھی، مثلاً گلگت سکردو ہائی وے پر 50 ارب سے زائد خرچ ہوا۔ ان کا کہنا تھا کہ اگرچہ ان علاقوں کو باقاعدگی سے این ایف سی فنڈ ملنا چاہیے، تاہم ان کے پاس بڑے بجٹ مؤثر طریقے سے استعمال کرنے کی مکمل صلاحیت ابھی موجود نہیں۔
نواز شریف نے احسن اقبال کو ہدایت کی کہ یہ معاملہ وزیراعظم شہباز شریف تک پہنچایا جائے، اور کہا کہ وہ خود بھی اس پر بات کریں گے، تاکہ گلگت بلتستان اور آزاد کشمیر کے فنڈز کسی کی صوابدید پر نہ ہوں بلکہ واضح طور پر مختص کیے جائیں۔
انہوں نے اعلان کیا کہ جیسے ہی ٹکٹ کی درخواستیں وصول ہوں گی، وہ خود مظفرآباد، گلگت یا سکردو میں امیدواروں سے ملاقات کر کے میرٹ پر فیصلے کریں گے۔
