لاہور ہائیکورٹ میں سانحہ 9 مئی سے متعلق مقدمات میں دی گئی سزاؤں کے خلاف دائر اپیلوں کی سماعت کے لیے باقاعدہ طور پر دو رکنی بینچ قائم کر دیا گیا ہے۔ اس بینچ کی تشکیل چیف جسٹس لاہور ہائیکورٹ محترمہ جسٹس عالیہ نیلم کے احکامات پر عمل میں لائی گئی ہے، تاکہ نو مئی کے واقعات سے جڑے انسدادِ دہشت گردی کے مقدمات کا قانونی جائزہ لیا جا سکے۔
تشکیل دیے گئے دو رکنی بینچ کی سربراہی جسٹس شہباز علی رضوی کریں گے، جبکہ بینچ نو جنوری سے اٹھائیس فروری تک مسلسل بنیادوں پر ان اپیلوں کی سماعت کرے گا۔ اس دوران سانحہ 9 مئی کے تناظر میں انسدادِ دہشت گردی عدالتوں کی جانب سے سنائے گئے فیصلوں کو چیلنج کرنے والی اپیلیں زیرِ غور آئیں گی۔
یہ بینچ سابق صوبائی وزیر میاں محمودالرشید، سینیٹر اعجاز چوہدری، ڈاکٹر یاسمین راشد سمیت دیگر ملزمان کی جانب سے دائر کردہ اپیلوں پر سماعت کرے گا، جن میں سزاؤں کو غیر قانونی اور آئین و قانون کے منافی قرار دیتے ہوئے کالعدم قرار دینے کی استدعا کی گئی ہے۔
