وزیرِ اعلیٰ پنجاب مریم نواز نے صوبے میں بڑھتے ہوئے جرائم پر سخت تشویش کا اظہار کرتے ہوئے فوری نوٹس لے لیا۔
انہوں نے امن و امان کی صورتِ حال کا جائزہ لینے کے لیے اعلیٰ سطح کا اجلاس طلب کیا، جس میں شیخوپورہ اور فیصل آباد میں جرائم پر قابو نہ پانے پر متعلقہ افسران کو سخت تنبیہ کی گئی۔ اس موقع پر انہوں نے آر پی اوز اور ڈی پی اوز کو ہدایت دی کہ وہ سی سی ڈی کے ساتھ مکمل ہم آہنگی کے ساتھ کام کریں۔
مریم نواز کا کہنا تھا کہ جرائم میں اضافہ نہایت افسوسناک اور قابلِ تشویش ہے۔ انہوں نے واضح کیا کہ صوبے کو جرائم سے پاک کرنے کے لیے پہلے ہی اقدامات کیے جا چکے ہیں، اس لیے اب کسی قسم کی غفلت برداشت نہیں کی جائے گی۔
انہوں نے مزید کہا کہ پولیس کو ہر طرح کی مداخلت سے آزاد کر دیا گیا ہے، اب اس کی کارکردگی سے نتائج سامنے آنا چاہئیں۔ ان کے مطابق ماضی میں تقرریاں سیاسی بنیادوں پر ہوتی تھیں، تاہم اب ایسا کوئی دباؤ موجود نہیں۔
وزیرِ اعلیٰ نے بعض حالیہ واقعات کا حوالہ دیتے ہوئے کہا کہ گلبرگ میں گاڑی کی بیٹری چوری کی ویڈیو، گجرات میں بس روک کر مسافروں سے سامان چھیننے جیسے واقعات انتہائی تشویشناک ہیں، خاص طور پر اس صورت میں جب صوبے میں سیف سٹی جیسے نظام موجود ہیں۔
انہوں نے منشیات سے متعلق بڑھتے ہوئے واقعات اور ایک بس کنڈیکٹر کی جانب سے بچی پر تشدد کے واقعے کو بھی شدید افسوسناک قرار دیتے ہوئے کہا کہ اگر قانون کا حقیقی خوف موجود ہو تو ایسے واقعات پیش نہ آئیں۔
