اسلام آباد پولیس نے افریقی ملک کے 9 شہریوں کو پولیس اہلکاروں سے بدتمیزی کرنے پر گرفتار کرلیا۔
پولیس ذرائع نے بتایا کہ یہ واقعہ 2 ستمبر کو سہ پہر 3 بجکر 15 منٹ پر جی10/1 پر پیش آیا جس میں افریقی ملک کے شہریوں کے ایک گروپ نے سڑک پر پولیس اہلکاروں سے بدتمیزی کی۔ پولیس نے معاملے کو دبانے کی کوشش کی لیکن ویڈیو سوشل میڈیا پر وائرل ہونے کے بعد انہیں مقدمہ درج کرنا پڑا۔
اس سے قبل مقامی لوگوں کے ایک گروپ اور افریقی ملک کے ایک شہری کے درمیان ایک حادثے پر تصادم کے بعد سڑک پر جھگڑا ہوا تھا۔ اسی دوران پولیس کی ایک ٹیم موقع پر پہنچی اور رمنا پولیس کو بلایا۔
غیر ملکیوں نے پولیس اہلکاروں سے بحث شروع کردی اور پولیس کو مارنا شروع کردیا۔
Don’t forget to Subscribe our Youtube Channel & Press Bell Icon.
ذرائع نے بتایا کہ پولیس نے مزید مدد طلب کی جو کچھ ہی دیر میں موقع پر پہنچ گئی۔ اس دوران غیر ملکیوں نے اپنے سفارت کاروں سے بھی رابطہ کیا جو وہاں پہنچ گئے۔
ذرائع نے بتایا کہ مقامی گروپ اس وقت موقع سے چلا گیا جب پولیس سفارت کاروں اور ان کے ہم وطنوں سے بات کر رہی تھی۔ انہوں نے کہا کہ بعد میں افریقی اور ان کے سفارت کار بھی وہاں سے چلے گئے ۔
ایک سینئر پولیس افسر نے بتایا کہ مقامی گروپ کی شناخت معلوم نہیں ہے کیونکہ پولیس نے ان کی شناخت کی تفصیلات لیے بغیر انہیں جانے کی اجازت دی۔ انہوں نے مزید کہا کہ دونوں گروپوں کے درمیان سڑک پر جھگڑا ہوا لیکن اس کی وجہ معلوم نہیں ہو سکی۔
ایک اور پولیس افسر نے بتایا کہ کیس کے اندراج کے بعد، رمنا پولیس نے افریقیوں کو گرفتار کیا، جس سے ظاہر ہوتا ہے کہ وہ اپنی شناخت اور ٹھکانے سے واقف تھے۔
پولیس نے غیر ملکیوں کے خلاف دفعہ 353 (سرکاری ملازم کو اپنی ڈیوٹی کی ادائیگی سے روکنے کے لیے حملہ یا مجرمانہ طاقت)، 186 (سرکاری ملازمین کو عوامی کاموں کی انجام دہی میں رکاوٹ ڈالنا) اور 506 (مجرمانہ دھمکی کی سزا) کے تحت مقدمہ درج کیا۔
