نگراں وزیراعظم انوار الحق کاکڑ نے عہدہ سنبھالنے کے آخری دن تک ملکی معیشت کو درپیش مسائل کے حل کے لیے کوششیں جاری رکھنے کے عزم کا اظہار کیا ہے۔
اس عزم کا اعادہ انہوں نے اسلام آباد میں کے الیکٹرک کے مختلف مسائل کے حوالے سے جائزہ اجلاس کی صدارت کرتے ہوئے کیا۔
وزیراعظم نے کہا کہ ملک میں غیر ملکی سرمایہ کاری کے لیے بین الاقوامی سرمایہ کاروں اور کاروباری برادری کو تمام سہولیات فراہم کرنا حکومت کی اولین ترجیح ہے۔
انہوں نے کہا کہ حکومت نے اس بنیادی اصول پر عمل کرتے ہوئے مثبت نتائج حاصل کیے ہیں۔
کراچی الیکٹرک کے وفد نے کے الیکٹرک کے دیرینہ مسائل کے حل پر وزیراعظم اور ان کی ٹیم کا شکریہ ادا کیا۔
Don’t forget to Subscribe our Youtube Channel & Press Bell Icon.
وزیراعظم نے اس موقع پر یقین دلایا کہ کے الیکٹرک کو درپیش باقی مسائل کو بھی ترجیحی بنیادوں پر حل کیا جائے گا۔ انہوں نے کہا کہ حکومت کراچی کے مکینوں کو بجلی کی بلاتعطل فراہمی کی راہ میں حائل تمام رکاوٹوں کو دور کرنے کی کوشش کر رہی ہے۔
انہوں نے کہا کہ عبوری حکومت مختصر عرصے میں ملک کو معاشی استحکام کی راہ پر گامزن کرنے کے لیے کچھ بڑے اور دیرینہ مسائل کو حل کرنے میں کامیاب رہی۔
اجلاس میں کراچی الیکٹرک کے مسائل اور ان کے حل کے لیے تجاویز پیش کی گئیں۔
انوار الحق کاکڑ نے ہدایت کی کہ نیپرا اور کراچی الیکٹرک مشترکہ طور پر ان مسائل کا ترجیحی بنیادوں پر حل تلاش کریں اور اس حوالے سے جلد رپورٹ پیش کریں۔
