ڈاکٹر عافیہ صدیقی کی رہائی اور وطن واپسی سے متعلق مقدمہ 29 اکتوبر کو اسلام آباد ہائی کورٹ کے لارجر بینچ میں سماعت کے لیے مقرر کیا گیا ہے۔
رجسٹرار آفس نے سماعت کی فہرست جاری کر دی ہے، جس کے مطابق چار رکنی لارجر بینچ تشکیل دیا گیا ہے۔ بینچ کی سربراہی جسٹس ارباب محمد طاہر کریں گے، جبکہ جسٹس خادم حسین سومرو، جسٹس اعظم خان اور جسٹس راجہ انعام امین منہاس بھی بینچ کا حصہ ہوں گے۔
گزشتہ سماعت ایک جج کی عدم دستیابی کے باعث منسوخ کر دی گئی تھی۔ بعد ازاں، جسٹس انعام امین منہاس نے یکم ستمبر کو فائل چیف جسٹس کو لارجر بینچ کے لیے بھیجی تھی۔
اس سے قبل یہ کیس جسٹس سردار اعجاز اسحاق خان کی عدالت میں زیرِ سماعت تھا۔ انہوں نے پچھلی سماعت پر وزیراعظم اور کابینہ ارکان کو توہینِ عدالت کے نوٹس جاری کیے تھے۔ تاہم، ٹیکس کیس کے لیے اسپیشل ڈویژن بینچ میں ان کی شمولیت کے بعد، سنگل بینچ میں زیرِ سماعت تمام مقدمات دوسرے بینچوں کو منتقل کر دیے گئے۔
