مشیر برائے سیاسی امور رانا ثنا اللہ نے کہا ہے کہ بلوچستان میں کسی بھی طرح کا حقوق کا مسئلہ نہیں ہے۔ وہاں معصوم شہریوں کو نشانہ بنانے والے لوگ پاکستان کے دشمن اور دشمن ملک کے ایجنٹ ہیں، نہ کہ ناراض یا متاثر افراد۔
سینیٹ میں اظہار خیال کرتے ہوئے انہوں نے بتایا کہ مجرم کہیں بھی کارروائیاں کر سکتے ہیں، اور بلوچستان میں ہلاکت خیز واقعات میں خاص صوبے کے لوگوں کو شناختی کارڈ دیکھ کر قتل کیا گیا۔ جعفر ایکسپریس کے واقعے میں شہری بچوں کے سامنے قتل ہوئے، اور یہ دہشت گرد سندور آپریشن کی ناکامی کا بدلہ لینے کے لیے سرگرم تھے۔
رانا ثنا اللہ نے کہا کہ حملوں میں 17 اہلکار اور 33 عام شہری شہید ہوئے، جبکہ کوئٹہ کے ریڈ زون میں داخل ہونے کی کوشش ناکام رہی۔ مجموعی طور پر 171 افراد ہلاک اور متعدد گرفتار ہوئے۔
انہوں نے کہا کہ دہشت گردوں کو رعایت دینے سے وہ طاقتور ہوتے ہیں، اور اپوزیشن نے دہشت گردی کی مناسب مذمت نہیں کی۔ انہوں نے فورسز اور شہید ہونے والے شہریوں کو خراجِ تحسین پیش کیا اور کہا کہ دشمن ملک کی حمایت کم ہونے سے دہشت گردی بھی ختم ہوگی۔
