وزیراعظم شہباز شریف نے ملک بھر کی بجلی تقسیم کار کمپنیوں (ڈسکوز) میں میٹر ریڈرز کے کردار کو بتدریج ختم کرنے کی منظوری دے دی ہے، سوائے کراچی الیکٹرک کے دائرہ کار کے۔ اس فیصلے کے تحت ’’اپنا میٹر، اپنی ریڈنگ‘‘ نامی نئی موبائل ایپ متعارف کروائی جا رہی ہے، جس کے ذریعے صارفین خود اپنی میٹر ریڈنگ جمع کرا سکیں گے۔
حکومت کو موجودہ نظام میں صارفین کی جانب سے اضافی بلنگ، غلط ریڈنگ اور شکایات کا سامنا تھا۔ نئی ایپ کے ذریعے ان مسائل کا خاتمہ اور شفافیت کو فروغ دیا جائے گا۔ وزیراعظم کی زیر صدارت 17 جون 2025 کو ہونے والے اجلاس میں اس منصوبے کی تفصیلات طے کی گئیں۔
ایپ کو اردو سمیت چار علاقائی زبانوں (پنجابی، سندھی، پشتو، بلوچی) میں لانچ کیا جائے گا تاکہ عوام اسے آسانی سے استعمال کر سکیں۔ پاور ڈویژن کو ہدایت دی گئی ہے کہ ایک ماہ میں منصوبہ بندی مکمل کرے اور سافٹ لانچ کے بعد ملک گیر مہم شروع کی جائے۔
حکومت نے اس مقصد کے لیے 316 ملین روپے مختص کیے ہیں تاکہ صارفین کو آگاہی دی جا سکے اور پرانا نظام ختم کیا جا سکے۔
