گجرات شہر اس وقت بدترین شہری سیلاب (اربن فلڈنگ) کی لپیٹ میں ہے، جہاں مسلسل موسلادھار بارشوں اور ناقص نکاسی آب کے باعث کئی علاقوں میں چار چار فٹ تک پانی جمع ہو گیا ہے۔
مدینہ سیداں، کچہری چوک، گوندل چوک، ظہور الٰہی اسٹیڈیم اور جیل چوک سمیت اہم مقامات ندی نالوں کا منظر پیش کرنے لگے ہیں۔
شہریوں میں شدید خوف و ہراس پھیل چکا ہے، مساجد سے بار بار اعلانات ہو رہے ہیں جبکہ ضلعی انتظامیہ مکمل طور پر بے بس دکھائی دیتی ہے۔
برساتی پانی کو موڑنے کی تمام کوششیں ناکام ہو چکی ہیں۔ نالہ بھنڈر اور نالہ بھمبر میں آنے والے سیلابی ریلوں نے کئی گھروں کو لپیٹ میں لے لیا ہے، حتیٰ کہ ایک مکان پانی کے بہاؤ میں بہہ گیا۔
ذرائع کے مطابق، اربن فلڈنگ سے دکانوں کا قیمتی سامان تباہ ہو چکا ہے، جبکہ سیشن کورٹ کے احاطے سمیت متعدد سرکاری عمارتیں بھی زیر آب آ چکی ہیں۔
شہری زندگی مکمل طور پر مفلوج ہو گئی ہے اور لوگ محفوظ مقامات کی تلاش میں گھروں سے نکل کر سڑکوں پر آ گئے ہیں۔
محکمہ موسمیات کے مطابق گزشتہ 24 گھنٹوں کے دوران گجرات اور گوجرانوالہ ڈویژن میں 570 ملی میٹر تک ریکارڈ توڑ بارش ہوئی، جو حالیہ تاریخ میں بدترین علاقائی بارش کا نیا ریکارڈ قرار دیا جا رہا ہے۔
