اسلام آباد – نگراں وزیر خزانہ شمشاد اختر نے بدھ کے روز واضح کیا کہ حکومت کے پاس عوام کو ریلیف فراہم کرنے کے لیے کوئی مالی گنجائش نہیں ہے کیونکہ ملک کی معاشی صورتحال توقع سے زیادہ خراب ہے۔
نگراں وزیرخزانہ نے سینیٹ کی قائمہ کمیٹی برائے فنانس اینڈ ریونیو کے دوران اور بعد ازاں میڈیا سے گفتگو کرتے ہوئے کہا کہ بدقسمتی سے معیشت کو تباہ کرنے میں کوئی کسر نہیں چھوڑی گئی۔ ان کا مزید کہنا تھا کہ نگراں حکومت کو انٹرنیشنل مانیٹری فنڈ (آئی ایم ایف) پروگرام ”وراثت میں ملا“۔
وزیر خزانہ کا یہ بیان ایسے وقت میں آیا ہے جب پاکستانی عوام بجلی کی بے تحاشا قیمتوں سے دوچار ہے جس نےشہریوں کو ملک بھر میں سڑکوں پر آنے پر مجبور کر دیا ہے۔ ابھی تک، نگراں حکومت کوئی بھی امدادی اقدامات کرنے میں ناکام رہی ہے کیونکہ آئی ایم ایف کی طرف سے اجازت نہیں ملی۔
Don’t forget to Subscribe our Youtube Channel & Press Bell Icon.
کرنسی کی قیمت میں جاری کمی کے بارے میں بات کرتے ہوئے، وزیر نے بتایا کہ اس کی وجہ کم آمد کے مقابلے ڈالر کا زیادہ اخراج ہے۔ انہوں نے وضاحت کی کہ پاکستان کا 70 فیصد ٹیکس ریونیو صرف قرضوں کی ادائیگی پر خرچ ہو رہا ہے۔ قبل ازیں سینیٹ کی قائمہ کمیٹی برائے خزانہ نے اپنے اجلاس میں امریکی ڈالر کے مقابلے کرنسی کی قدر میں مسلسل کمی پر تشویش کا اظہار کیا تھا۔ بدھ کے روز ابتدائی ٹریڈنگ کے دوران پاکستانی روپیہ امریکی ڈالر کے مقابلے میں نئی کم ترین سطح پر پہنچنے کے بعد ریکارڈ توڑتا جا رہا ہے، سرکاری زر مبادلہ 304 روپے تک پہنچ گیا۔
انہوں نے خبردار کیا کہ اگر حکومت نے آئی ایم ایف کے پروگرام پر عمل درآمد روک دیا تو ڈالر کی قیمت مزید بڑھ سکتی ہے اور معاشی صورتحال مزید خراب ہو جائے گی۔ شمشاد اختر نے پارلیمانی کمیٹی کو بتایا کہ خسارے میں چلنے والے سرکاری اداروں کی جلد از جلد نجکاری کرنے کی ضرورت ہے کیونکہ ان کا نقصان ناقابل برداشت ہے۔
