ارشد محمود اعوان
دی ہیگ میں قائم مستقل ثالثی عدالت کا متفقہ فیصلہ کہ سندھ طاس معاہدے کو کسی ایک فریق کی جانب سے یکطرفہ طور پر معطل کرنے سے عدالت کی عملداری متاثر نہیں ہو سکتی، پاکستان کے لیے ایک اہم قانونی اور اخلاقی کامیابی ہے۔ یہ فیصلہ محض ایک مقدمے کی حد تک محدود نہیں بلکہ عالمی سطح پر ایک اصولی مؤقف کو تقویت دیتا ہے کہ بین الاقوامی معاہدے کسی ریاست کی خواہش یا سیاسی مصلحت کے تابع نہیں ہوتے بلکہ دونوں فریقوں کی باہمی رضامندی ہی ان کے تسلسل یا خاتمے کی بنیاد ہوتی ہے۔
اگرچہ پاکستان نے یہ مقدمہ ۲۰۱۶ء میں دائر کیا تھا، تاہم اس فیصلے کی معنویت موجودہ حالات میں کہیں زیادہ گہری ہے۔ بھارت نے پاہلگام واقعے کے بعد سندھ طاس معاہدے کو ‘معطل’ قرار دے کر یکطرفہ فیصلہ کرنے کی کوشش کی تھی، جو بین الاقوامی قانون اور معاہدہ کی روح کے سراسر منافی ہے۔ عدالت نے اپنے فیصلے میں واضح کیا کہ معاہدہ اُس وقت تک مؤثر اور نافذ العمل رہے گا جب تک دونوں ممالک باضابطہ طور پر متفق ہو کر اس سے دستبردار نہ ہو جائیں۔ چونکہ پاکستان نہ صرف معاہدے کو تسلیم کرتا ہے بلکہ اس پر عملدرآمد بھی جاری رکھے ہوئے ہے، لہٰذا بھارت کا یکطرفہ مؤقف قانونی طور پر بے بنیاد ہے۔
عدالت کے اس فیصلے سے یہ اصول مضبوط ہوتا ہے کہ بین الاقوامی معاہدے محض سیاسی حالات یا اندرونی دباؤ کے تحت معطل نہیں کیے جا سکتے۔ ایسے معاہدے جن کی بنیاد مذاکرات، ضوابط اور بین الاقوامی اصولوں پر رکھی گئی ہو، وہ کسی ایک فریق کی خواہش سے ختم نہیں ہو سکتے۔ یہ فیصلہ ان عالمی رجحانات کے لیے بھی ایک پیغام ہے جو منتخب معاہدوں کو اپنے مفاد کے مطابق مانتے یا رد کرتے ہیں۔
پاکستان کی جانب سے فیصلے کا خیرمقدم ایک محتاط اور قانونی فہم کا مظہر ہے، جبکہ بھارت کی طرف سے دی گئی جارحانہ اور توہین آمیز ردعمل نے عالمی اداروں کے احترام پر سوالیہ نشان لگا دیا ہے۔ بھارتی وزارت خارجہ کا یہ بیان کہ وہ اس عدالت کو قانونی حیثیت ہی نہیں دیتی، نہ صرف افسوسناک ہے بلکہ بین الاقوامی سفارتی اصولوں سے انحراف بھی ہے۔ اگر ہر ریاست اسی اصول پر عمل کرے کہ صرف اپنے حق میں آنے والے فیصلے تسلیم کرے اور باقی کو رد کر دے، تو پھر اقوامِ متحدہ، عالمی عدالتِ انصاف اور دیگر عالمی اداروں کی عملداری بے معنی ہو کر رہ جائے گی۔
بھارتی مؤقف میں ایک اور تشویشناک پہلو سازشی اندازِ بیان ہے، جس میں عدالت کے فیصلے کو پاکستان کی ایما پر ایک “ڈھونگ” قرار دیا گیا ہے۔ یہ نہایت غیر سنجیدہ اور لغو دعویٰ ہے جو اس بات کی عکاسی کرتا ہے کہ بھارت بین الاقوامی اداروں کی خودمختاری کو تسلیم کرنے کو تیار نہیں۔ اگر یہ معاملہ پانی جیسے سنگین مسئلے سے متعلق نہ ہوتا، تو شاید اس ردعمل کو محض طنزیہ یا مزاحیہ قرار دیا جاتا۔ تاہم پانی کا مسئلہ جنوبی ایشیا کے لیے نہایت حساس اور سلامتی سے جڑا ہوا ہے، اور ایسی غیر ذمہ دارانہ زبان صورتحال کو مزید بگاڑ سکتی ہے۔
اگرچہ پاکستان کو اس فیصلے سے قانونی تقویت ملی ہے، لیکن اس کا مطلب یہ نہیں کہ خطرہ ٹل گیا ہے۔ بھارت کے حالیہ بیانات، خاص طور پر وزیرداخلہ کا یہ کہنا کہ سندھ طاس معاہدہ کبھی بحال نہیں کیا جائے گا اور پاکستان کے حصے کا پانی راجستھان کی طرف موڑ دیا جائے گا، ایک سنجیدہ چیلنج کی طرف اشارہ ہے۔ یہ مؤقف محض سیاسی بیان بازی نہیں بلکہ ایک ایسی حکمتِ عملی کی جھلک ہے جو پاکستان کے آبی حقوق، زراعت، معیشت اور ماحولیاتی توازن کے لیے خطرہ بن سکتی ہے۔
وزیرِاعظم شہباز شریف کی جانب سے بھارت کے ساتھ تمام معاملات پر بات چیت کی خواہش یقیناً ایک مثبت سفارتی پہل ہے، لیکن بھارت کی جانب سے مسلسل انکار اور سخت رویہ اس بات کا ثبوت ہے کہ وہ مسائل کو پرامن طریقے سے حل کرنے کے بجائے یکطرفہ اقدامات کو ترجیح دیتا ہے۔ اس صورتحال میں پاکستان کے لیے ضروری ہے کہ وہ نہ صرف قانونی سطح پر بلکہ سفارتی اور تزویراتی محاذ پر بھی بھرپور تیاری کرے۔
پاکستان کو چاہیے کہ وہ اپنے بہترین قانونی ماہرین، سفارت کاروں اور ماحولیاتی منصوبہ سازوں کو ایک پلیٹ فارم پر لا کر ایک جامع قومی حکمتِ عملی تیار کرے جو سندھ طاس معاہدے کے تحفظ کے ساتھ ساتھ پاکستان کے آبی مفادات کا مؤثر دفاع کر سکے۔ اس کے ساتھ ہی عالمی برادری کو بھی متحرک کیا جائے تاکہ بھارت کے غیر قانونی عزائم کو عالمی سطح پر بے نقاب کیا جا سکے۔
دی ہیگ کی عدالت کا فیصلہ صرف ایک قانونی جیت نہیں بلکہ پاکستان کے اصولی مؤقف کی عالمی سطح پر توثیق ہے۔ تاہم یہ کامیابی صرف اس وقت دیرپا ثابت ہو گی جب پاکستان اس قانونی فیصلہ کو سفارتی و تزویراتی حکمتِ عملی میں تبدیل کرے۔ اگر بھارت یکطرفہ اقدامات سے باز نہ آیا تو خطے میں کشیدگی بڑھے گی اور نتیجہ نقصان دہ ہو سکتا ہے۔ اس لیے پاکستان کو اپنی خودمختاری، سلامتی اور آئندہ نسلوں کے لیے پانی کے حق کو قانون کے ساتھ ساتھ حکمت و بصیرت سے بھی محفوظ بنانا ہوگا۔
سندھ کے پانی صرف بہتے ہوئے دریا نہیں بلکہ پاکستان کی خودمختاری کی علامت ہیں۔ اور خودمختاری محض الفاظ میں نہیں، بلکہ قانون، حکمت اور مسلسل بیداری سے زندہ رکھی جاتی ہے۔
