اسلام آباد ہائی کورٹ کے دو رکنی بینچ نے سابق وزیراعظم نواز شریف کے خلاف ایون فائل اور العزیزیہ اسٹیل ملز سے متعلق دائر دو نیب ریفرنسز میں ان کے دائمی وارنٹ گرفتاری معطل کردیے۔
اس سے قبل آج نیب کی احتساب عدالت نے توشہ خانہ کیس میں بھی نواز شریف کے وارنٹ گرفتاری معطل کرتے ہوئے انہیں 24 اکتوبر کو عدالت میں پیش ہونے کا حکم دیا تھا۔
چیف جسٹس عامر فاروق اور جسٹس میاں گل حسن اورنگزیب نے ان ریفرنسز کے خلاف نواز شریف کے دائمی وارنٹ گرفتاری معطل کرنے کی درخواست کی سماعت کی۔
نواز شریف کی نمائندگی سابق اٹارنی جنرل اعظم نذیر تارڑ اور امجد پرویز نے کی۔ جبکہ نیب کی نمائندگی پراسکیوٹرز رافع مقصود اور نعیم نے کی۔
چیف جسٹس عامر فاروق نے نیب پراسکیوٹرز سے پوچھا کہ گزشتہ روز وارنٹ گرفتاری کی معطلی پر کوئی اعتراض نہیں ہے آپ کو؟ نیب پراسکیوٹرز نے عدالت کو بتایا کہ انہیں آج بھی کوئی اعتراض نہیں ہے۔ عدالت نے پھر کہا کہ یہ درخواست بلا مقابلہ ہے اور اس پر دلائل کی ضرورت نہیں ہے۔
Don’t forget to Subscribe our Youtube Channel & Press Bell Icon.
عدالت نے نیب سے پوچھا کہ آپ نے کس سے ہدایات لی ہیں؟ نیب پراسکیوٹرز نے جواب دیا کہ پراسکیوٹر جنرل نیب سے ہدایات لی ہیں۔ اس کے بعد عدالت نے استغاثہ کو حکم دیا کہ وہ تحریری منظوری عدالت میں جمع کرائیں۔
جسٹس گل حسن اورنگزیب نے نیب پراسکیوٹرز سے کہا کہ ہم یہ فیصلہ آپ کی منظوری سے کر رہے ہیں۔
اس کے بعد چیف جسٹس نے میاں نواز شریف کے دائمی وارنٹ گرفتاری معطل کرنے کا حکم دیا اور انہیں 23 اکتوبر کو عدالت میں پیش ہونے کو کہا۔ عظیم نذیر تارڑ نے عدالت سے استدعا کی کہ کیا آپ ہمیں ایک دن اور دے سکتے ہیں کیونکہ ہماری احتساب عدالت میں 24 اکتوبر کو سماعت ہے جس پر عدالت نے سماعت 24 اکتوبر کو مقرر کی۔
عدالت نے نواز شریف کو 24 اکتوبر کو عدالت میں پیش ہونے تک گرفتار نہ کرنے کا بھی حکم دیا ہے۔
