یروشلم/قاہرہ: اسرائیلی فوج نے غزہ کے شمالی و جنوبی علاقوں میں وسیع زمینی کارروائی شروع کر دی، جس کے دوران فضائی حملوں میں کم از کم 130 فلسطینی جاں بحق ہوئے۔ غزہ کی وزارت صحت کے مطابق، ایک ہفتے میں 464 سے زائد فلسطینی شہید ہو چکے ہیں۔
یہ کارروائی قطر میں اسرائیل و حماس کے درمیان بالواسطہ مذاکرات میں کسی پیش رفت کے بغیر سامنے آئی۔ اسرائیل نے جنگ بندی، یرغمالیوں کی رہائی، حماس کی جلاوطنی اور غزہ کی غیر فوجی حیثیت جیسے نکات پر مبنی تجویز دی، جسے حماس نے مسترد کر رکھا ہے۔
اسرائیل نے کہا کہ وہ ایسے معاہدے پر آمادہ ہے جس میں جنگ کا خاتمہ شامل ہو، لیکن ایک حماس رہنما کے مطابق اسرائیل صرف یرغمالیوں کی رہائی چاہتا ہے، جنگ کے خاتمے کا کوئی وعدہ نہیں کر رہا۔
غزہ میں ہسپتال زخمیوں سے بھر چکے ہیں، امدادی سامان کی شدید قلت ہے، اور 75 فیصد ایمبولینس ایندھن کی کمی کے باعث بند ہو چکی ہیں۔ خان یونس میں خیمہ بستی پر حملے میں خواتین و بچے جاں بحق ہوئے جبکہ انڈونیشیا کے ہسپتال نے اسرائیلی گولہ باری کے باعث کام بند کر دیا ہے۔
اب تک 53,000 سے زائد فلسطینی شہید اور 2.3 ملین کی آبادی بے گھر ہو چکی ہے۔ بین الاقوامی ماہرین نے قحط کے خطرے سے خبردار کیا ہے۔
