پنجابی فلموں کے معروف کامیڈین جسوندر سنگھ بھلہ 65 برس کی عمر میں اس جہانِ فانی کو الوداع کہہ گئے۔۔ اطلاعات کے مطابق وہ جمعہ کی صبح موہالی کے فورٹس اسپتال میں زندگی کی بازی ہار گئے۔
بھارتی میڈیا کی رپورٹوں کے مطابق جسوندر بھلہ کی آخری رسومات ہفتہ کے روز بالونگی میں ادا کی جائیں گی، جہاں پنجابی فلم انڈسٹری سے تعلق رکھنے والے ان کے بے شمار ساتھی فنکار اور مداح بڑی تعداد میں شریک ہوں گے۔
جسوندر بھلہ نے اپنی زندگی کا بیشتر حصہ پنجابی فلم انڈسٹری کو وقف کیا۔ وہ اپنے منفرد مزاحیہ انداز اور برجستہ مکالمہ گوئی کی وجہ سے ناظرین میں بے حد مقبول رہے۔ ان کے مزاحیہ کرداروں نے نہ صرف فلموں کو کامیابی دلائی بلکہ پنجابی ناظرین کو ایک الگ ہی ذائقہ بخشا۔
ان کی یادگار فلموں میں “کیری آن جٹا” شامل ہے جس میں انہوں نے اپنی اداکاری سے ایسا رنگ بھرا کہ وہ کردار فلمی دنیا میں ہمیشہ یاد رکھا جائے گا۔ جسوندر بھلہ کے جانے سے پنجابی فلم انڈسٹری ایک بڑے خلا کا شکار ہو گئی ہے جسے پر کرنا آسان نہ ہوگا۔
