محکمہ موسمیات نے پیش گوئی کی ہے کہ آج سے مون سون کی شدت بڑھنے کا امکان ہے۔ محکمے کے مطابق خلیج بنگال میں موجود ہوا کا کم دباؤ مون سون کے سسٹم کو مزید طاقتور بنائے گا۔
اس نئے موسمی نظام کے باعث آج سے منگل تک اسلام آباد، پنجاب، خیبر پختونخوا اور کشمیر میں شدید بارشیں متوقع ہیں۔ اسی طرح کراچی سمیت سندھ کے مختلف شہروں اور بلوچستان میں بھی آج سے 22 اگست تک موسلادھار بارشوں کی پیش گوئی کی گئی ہے۔
ادھر این ڈی ایم اے نے ممکنہ بارشوں، اچانک سیلاب، لینڈ سلائیڈنگ اور کلاؤڈ برسٹ سے متاثرہ علاقوں میں سیاحتی سرگرمیوں پر پابندی کی ایڈوائزری جاری کی ہے۔ ایڈوائزری کے مطابق ضرورت پڑنے پر دفعہ 144 نافذ کر کے سیاحوں کو ان علاقوں میں جانے سے روکا جائے گا۔
اسلام آباد کی ضلعی انتظامیہ نے بھی احتیاطی اقدام کے طور پر مارگلہ ہلز کی ٹریل ٹو، تھری، فور اور فائیو کو 19 اگست تک شہریوں کے لیے بند کردیا ہے، جبکہ سید پور گاؤں کے عقب میں واقع ٹریل بھی عارضی طور پر بند رہے گا۔
