وزیرِاعظم شہباز شریف نے کہا ہے کہ ملک کی ترقی اور خوشحالی اس وقت تک ممکن نہیں جب تک پرانے اور فرسودہ نظام کو جدید، ڈیجیٹل اور مؤثر طرزِ حکمرانی میں تبدیل نہ کیا جائے۔ جمعہ کو وفاقی وزارتوں کی کارکردگی کا جائزہ لینے کے لیے اجلاس کی صدارت کرتے ہوئے انہوں نے کہا کہ جدید تقاضوں سے ہم آہنگ نظام کے بغیر اقتصادی ترقی ممکن نہیں۔
انہوں نے وزارتوں کو ہدایت کی کہ وہ کارکردگی بہتر بنانے کے لیے اصلاحات متعارف کروائیں اور ہر شعبے میں ماہرین کی خدمات حاصل کریں۔
وزیرِاعظم نے ایک اعلیٰ اختیاراتی کمیٹی تشکیل دی ہے جو وزارتوں کو جدید نظام کے ساتھ ہم آہنگ کرنے، بہترین افرادی قوت کی بھرتی، اور مؤثر طرزِ حکمرانی کے لیے قابل عمل تجاویز تیار کرے گی۔
اجلاس میں وزارتِ توانائی نے اصلاحاتی اقدامات پر مبنی نظام کے بارے میں تفصیلی بریفنگ دی۔ وزیرِاعظم نے اس وزارت کی ٹیم اور وفاقی وزیر سردار اویس لغاری کو سراہتے ہوئے کہا کہ ان کی کوششوں سے بجلی کے نقصانات میں کمی آئی اور قومی خزانے کو اربوں روپے کی بچت ہوئی، جو دیگر وزارتوں کے لیے ایک قابلِ تقلید ماڈل ہے۔
انہوں نے زور دیا کہ بین الاقوامی شہرت یافتہ ماہرین کی مدد سے نئے خیالات، جدید سوچ اور مؤثر اصلاحات ممکن ہیں۔
اجلاس میں مختلف وزارتوں میں کام کرنے والے ماہرین کے پروفائلز اور موجودہ نظام کی کارکردگی پر بھی بریفنگ دی گئی۔ اجلاس میں وفاقی وزراء ڈاکٹر مصدق ملک، احد چیمہ، شزا فاطمہ، علی پرویز ملک، وزیرِ مملکت بلال اظہر کیانی، مشیرِ اعلیٰ مشرف زیدی اور دیگر سینئر حکام نے شرکت کی۔
عالمی یومِ آبادی کے موقع پر اپنے پیغام میں وزیرِاعظم شہباز شریف نے کہا کہ حکومت ایک جامع اور انسانی حقوق پر مبنی آبادی پالیسی کے لیے پُرعزم ہے۔ اس پالیسی میں صحت کی سہولیات تک مساوی رسائی، باخبر خاندانی منصوبہ بندی، اور افراد کو باوقار اور خودمختار فیصلوں کی آزادی فراہم کرنے پر زور دیا گیا ہے
