پاکستان تحریک انصاف (پی ٹی آئی) کے بانی عمران خان کے بیٹوں کی پاکستان آمد اور ویزا معاملے پر وزارت داخلہ کی جانب سے وضاحت سامنے آگئی ہے۔ اس معاملے پر عمران خان کی بہن علیمہ خان نے حال ہی میں بیان دیا تھا کہ سابق وزیراعظم کے بیٹے قاسم اور سلیمان خان نے لندن میں پاکستانی ہائی کمیشن میں ویزے کے لیے درخواست جمع کرائی ہے، اور یہ درخواستیں وزارت داخلہ میں زیر غور ہیں۔
وزارت داخلہ کے ذمہ دار ذرائع نے وضاحت دیتے ہوئے کہا ہے کہ عمران خان کے بیٹوں کی کسی بھی قسم کی ویزا درخواست اس وقت وزارت داخلہ کے پاس موجود نہیں اور نہ ہی زیر غور ہے۔ ذرائع کے مطابق ویزوں کا اجراء، چاہے وہ فیملی ویزا ہو یا کسی اور نوعیت کا، وزارت داخلہ کا براہ راست اختیار نہیں ہے۔ اس حوالے سے یہ بھی واضح کیا گیا کہ ویزا اجراء کا عمل بنیادی طور پر وزارت خارجہ اور بیرونِ ملک پاکستانی ہائی کمیشن کے دائرہ کار میں آتا ہے، جبکہ وزارت داخلہ اس نوعیت کے معاملات میں فریق نہیں ہوتی۔
ذرائع نے مزید کہا کہ وزارت داخلہ کے حوالے سے یہ دعویٰ حقیقت پر مبنی نہیں کہ عمران خان کے بیٹوں کی ویزا درخواستیں وہاں زیر غور ہیں۔ ویزا کے اجرا کا طریقہ کار یہ ہے کہ درخواستیں متعلقہ ہائی کمیشن میں جمع کرائی جاتی ہیں، جہاں سے ان کی جانچ پڑتال اور کارروائی وزارت خارجہ کے تحت انجام دی جاتی ہے۔ وزارت داخلہ صرف مخصوص کیٹیگریز کے معاملات میں شامل ہوتی ہے، جبکہ عام ویزوں یا فیملی ویزوں میں اس کا کوئی کردار نہیں۔
یہ وضاحت ایسے وقت میں سامنے آئی ہے جب علیمہ خان کے بیان کے بعد مختلف حلقوں میں یہ تاثر پیدا ہوا تھا کہ عمران خان کے بیٹوں کے پاکستان آنے کے لیے درکار ویزا درخواستیں وزارت داخلہ کے زیر التواء ہیں۔ وزارت داخلہ کے موقف کے مطابق یہ تاثر غلط اور بے بنیاد ہے، اور ویزا کے تمام معاملات وزارت خارجہ اور پاکستانی ہائی کمیشن کے دائرہ کار میں ہی رہیں گے۔
