ایران اور اسرائیل کے درمیان بڑھتی ہوئی کشیدگی کے باعث منگل کے روز عالمی منڈی میں خام تیل کی قیمتوں میں 2 فیصد سے زائد اضافہ ریکارڈ کیا گیا۔ امریکی صدر ڈونلڈ ٹرمپ کی جانب سے تہران خالی کرنے کی اپیل نے خطے میں عدم استحکام کے خدشات مزید بڑھا دیے۔
برینٹ کروڈ آئل 1.17 ڈالر اضافے کے ساتھ 74.40 ڈالر فی بیرل اور ویسٹ ٹیکساس انٹرمیڈیٹ 1.34 ڈالر اضافے کے ساتھ 73.11 ڈالر فی بیرل پر پہنچ گیا۔
پیر کے روز قیمتیں اس وقت گری تھیں جب یہ اطلاعات آئیں کہ ایران جنگ بندی کا خواہاں ہے، تاہم منگل کو صورتحال بگڑ گئی۔ تہران میں دھماکوں اور فضائی دفاعی نظام کی سرگرمیوں کی خبریں آئیں، جبکہ تل ابیب میں ایرانی میزائل حملوں کے بعد سائرن بجائے گئے۔
ایران، جو اوپیک کا تیسرا بڑا پیداواری ملک ہے، اگر تنازع میں تیل کی ترسیل متاثر ہوئی تو عالمی قیمتیں مزید بڑھ سکتی ہیں۔
ادھر اسرائیلی حملے میں ایران کے سرکاری نشریاتی ادارے اور اہم یورینیم افزودگی تنصیب کو نقصان پہنچا۔ اقوام متحدہ کے جوہری نگران ادارے نے نطنز میں بڑے پیمانے پر تباہی کی تصدیق کی ہے۔
ٹرمپ کا کہنا ہے کہ ایران کو حملوں سے قبل جوہری معاہدہ کر لینا چاہیے تھا، تاہم اب وہ سمجھتے ہیں کہ ایران معاہدے کے لیے تیار ہو سکتا ہے۔
اگر امریکہ پابندیاں نرم کرتا ہے تو ایران کی برآمدات میں اضافہ ممکن ہے، جس سے عالمی منڈی میں قیمتوں پر دباؤ آ سکتا ہے۔
دوسری جانب، اوپیک پلس نے عالمی معیشت کی بہتری کی امید ظاہر کی ہے اور غیر اوپیک ممالک سے 2026 میں پیداوار میں اضافے کی پیشگوئی کم کر دی ہے۔
