فیلڈ مارشل سید عاصم منیر سے بنگلہ دیش کے ایئر چیف مارشل حسن محمود خان نے ملاقات کی، جس میں دونوں ممالک کے درمیان دفاعی تعاون کو مزید مضبوط بنانے کے عزم کا اعادہ کیا گیا۔
پاک فوج کے شعبہ تعلقات عامہ کے مطابق بنگلہ دیش ایئر فورس کے سربراہ نے جنرل ہیڈکوارٹرز راولپنڈی میں چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر سے تفصیلی ملاقات کی۔ ملاقات کے دوران دوطرفہ دلچسپی کے امور، علاقائی صورتحال اور دفاعی و عسکری تعاون کو وسعت دینے کے مختلف پہلوؤں پر تبادلہ خیال کیا گیا۔
آئی ایس پی آر کے بیان میں کہا گیا کہ دونوں فریقین نے پاکستان اور بنگلہ دیش کی مسلح افواج کے درمیان پیشہ ورانہ روابط، تربیتی تعاون اور عسکری تبادلوں کو مزید مؤثر بنانے کی ضرورت پر زور دیا۔ اس موقع پر بنگلہ دیشی ایئر چیف نے پاکستان کی مسلح افواج کے اعلیٰ پیشہ ورانہ معیار کو سراہتے ہوئے خطے میں امن اور استحکام کے لیے ان کے کردار کی تعریف کی۔
فیلڈ مارشل سید عاصم منیر نے بنگلہ دیش کے ساتھ طویل المدتی اور مضبوط دفاعی تعلقات کے فروغ کے لیے پاکستان کے پختہ عزم کا اعادہ کیا۔ آئی ایس پی آر کے مطابق یہ ملاقات دونوں برادر ممالک کے درمیان دیرینہ اعتماد اور مضبوط تعلقات کی عکاس ہے۔
