پاکستان اور بنگلادیش کے درمیان اعلیٰ سطحی وفود کی سطح پر مذاکرات ڈھاکا میں شروع ہو گئے ہیں۔ ترجمان دفتر خارجہ کے مطابق ان مذاکرات میں دونوں ممالک کے درمیان تعلقات کو وسعت دینے کے مختلف پہلوؤں پر بات چیت کی جا رہی ہے۔
پاکستانی وفد کی قیادت نائب وزیراعظم اور وزیرِ خارجہ سینیٹر اسحاق ڈار کر رہے ہیں، جبکہ بنگلادیش کی طرف سے مشیرِ خارجہ امور محمد توحید حسین وفد کی سربراہی کر رہے ہیں۔ مذاکرات کے ایجنڈے میں دوطرفہ تعلقات، اقتصادی و تجارتی تعاون کے فروغ اور علاقائی امور شامل ہیں۔
اس دورے کی خاص اہمیت اس لیے بھی ہے کہ 13 برس بعد کسی پاکستانی وزیر خارجہ نے بنگلادیش کا تاریخی دورہ کیا ہے۔ توقع ظاہر کی جا رہی ہے کہ اس موقع پر تجارت اور تعاون سے متعلق کئی اہم معاہدوں پر دستخط ہوں گے۔
مذاکرات سے قبل نائب وزیراعظم اور وزیرِ خارجہ اسحاق ڈار نے بنگلادیش کے مشیرِ تجارت شیخ بشیر الدین سے ملاقات کی۔ اس ملاقات میں اقتصادی و تجارتی تعلقات کو مزید بہتر بنانے کے طریقہ کار پر تبادلہ خیال ہوا۔ اس کے ساتھ ساتھ تجارتی روابط میں اضافے اور باہمی روابط کو فروغ دینے پر بھی خصوصی گفتگو کی گئی۔
یہ ملاقات ایک ناشتے کے دوران ہوئی جس میں چیئرمین بنگلادیش سرمایہ کاری ڈیولپمنٹ اتھارٹی، گورنر بنگلادیش بینک، چیئرمین نیشنل بورڈ آف ریونیو سمیت دیگر اہم حکام نے بھی شرکت کی۔
