پاکستان اور بنگلہ دیش کے درمیان طویل عرصے سے منتظر تین میچوں پر مشتمل ٹی ٹوئنٹی انٹرنیشنل سیریز کا آغاز 28 مئی سے ہوگا، جس کا اعلان پاکستان کرکٹ بورڈ (پی سی بی) نے اپنے تازہ ترین شیڈول میں کیا ہے۔
پی سی بی کی جانب سے جاری کردہ سرکاری پریس ریلیز کے مطابق سیریز کا پہلا میچ بدھ، 28 مئی کو کھیلا جائے گا، جبکہ دوسرا میچ جمعہ، 30 مئی کو ہوگا۔ تیسرا اور آخری میچ اتوار، یکم جون کو شیڈول کیا گیا ہے۔ تمام میچز رات 8 بجے لاہور کے قذافی اسٹیڈیم میں فلڈ لائٹس کی روشنی میں کھیلے جائیں گے۔
بنگلہ دیشی ٹیم 25 مئی کو لاہور پہنچے گی، جہاں سیریز سے قبل مکمل تیاری کے لیے 26 اور 27 مئی کو ٹریننگ سیشن منعقد کیے جائیں گے۔ پی سی بی نے مہمان ٹیم کی میزبانی پر خوشی کا اظہار کرتے ہوئے کہا، ’’ہم بنگلہ دیش ٹیم کو خوش آمدید کہنے اور ایک دلچسپ اور اعلیٰ معیار کی کرکٹ سیریز کی میزبانی کے منتظر ہیں۔‘‘
قابل ذکر بات یہ ہے کہ پی سی بی پہلے ہی 16 رکنی اسکواڈ کا اعلان کر چکا ہے، جس میں سابق کپتان بابراعظم، تجربہ کار وکٹ کیپر بیٹر محمد رضوان اور فاسٹ بولر شاہین شاہ آفریدی شامل نہیں ہیں۔
یاد رہے کہ اس سیریز کا آغاز پہلے 25 مئی سے ہونا تھا، تاہم اسلام آباد اور نئی دہلی کے درمیان حالیہ کشیدگی کے باعث میچز کو ملتوی کر کے نئے شیڈول کے تحت ترتیب دیا گیا ہے۔
