ترجمان دفتر خارجہ شفقت علی خان نے جمعے کے روز کہا کہ یہ قابلِ افسوس اقدام نہ صرف بین الاقوامی قوانین کی صریح خلاف ورزی ہے بلکہ فلسطینی عوام کے حقوق اور عالمی ضابطوں کی مستقل پامالی کو بھی ظاہر کرتا ہے۔
انہوں نے مزید کہا کہ ایسے اشتعال انگیز اور جان بوجھ کر کیے گئے اقدامات ظاہر کرتے ہیں کہ قابض طاقت کس طرح منظم انداز میں امن کی کوششوں کو ناکام بنانے اور اپنی غیر قانونی تسلط کو مضبوط کرنے کی کوشش کر رہی ہے۔
ترجمان نے خبردار کیا کہ اس نوعیت کے یکطرفہ اقدامات خطے میں کشیدگی میں خطرناک حد تک اضافے اور ایک منصفانہ و پائیدار حل کے امکانات کو نقصان پہنچاتے ہیں۔
پاکستان نے عالمی برادری سے پرزور مطالبہ کیا ہے کہ وہ فوری اور مؤثر اقدامات کے ذریعے اسرائیل کو اقوامِ متحدہ کی سلامتی کونسل کی قراردادوں اور بین الاقوامی انسانی قوانین کی خلاف ورزیوں پر جوابدہ بنائے۔ پاکستان واضح کرتا ہے کہ اس قسم کے اقدامات نہ تو تسلیم کیے جائیں گے اور نہ ہی وہ مقبوضہ فلسطینی علاقوں کی بین الاقوامی حیثیت کو تبدیل کر سکتے ہیں۔
ترجمان نے اس موقع پر پاکستان کے اس اصولی مؤقف کا اعادہ بھی کیا کہ فلسطینی عوام کو خود ارادیت کا ناقابلِ تنسیخ حق حاصل ہے۔ انہوں نے کہا کہ پاکستان مضبوطی سے ایک آزاد، خودمختار اور قابلِ عمل فلسطینی ریاست کے قیام کا حامی ہے، جس کی سرحدیں جون 1967 سے پہلے والی ہوں اور اس کا دارالحکومت القدس الشریف ہو، جیسا کہ اقوامِ متحدہ کی قراردادوں میں واضح کیا گیا ہے۔
