پاکستان نے سندھ طاس معاہدہ کو بھارت کی جانب سے معطلی کے اقدام پر مستقل انڈس کمیشن کے ذریعے حل کرنے کی کوشش کا ارادہ ظاہر کیا ہے، تاہم اگر مذاکرات ناکام ہوئے تو پاکستان مستقل ثالثی عدالت سے رجوع کرے گا۔
اٹارنی جنرل منصور عثمان اعوان کے مطابق پاکستان معاہدے کے ضامن عالمی بینک سے ثالثی عدالت کے قیام کی درخواست کرے گا۔ بھارت نے اپریل دو ہزار پچیس میں پاہلگام حملے کے بعد قومی سلامتی کا جواز بنا کر معاہدہ معطل کر دیا تھا۔
ذرائع کے مطابق پاکستان مکمل قانونی راستہ اختیار کرے گا تاکہ بھارت کی یکطرفہ خلاف ورزیاں روکی جا سکیں۔ اگر عالمی بینک دباؤ میں آ کر ثالثی عدالت قائم نہ کرے، تو بھی پاکستان کا مؤقف مضبوط ہوگا کہ اس نے تمام قانونی اقدامات اختیار کیے۔
اگر عدالت پاکستان کے حق میں فیصلہ دے اور بھارت اس پر عمل نہ کرے تو یہ بین الاقوامی اصولوں کے تحت دشمنی کے زمرے میں آ سکتا ہے۔
پاکستان فی الحال پانی سے متعلق تمام معلومات بھارت کو فراہم کر رہا ہے تاکہ عالمی سطح پر شفافیت اور نیک نیتی کا پیغام جائے۔
