جے ایس گلوبل کی رپورٹ کے مطابق، اپریل 2025 میں پاکستان کی سالانہ مہنگائی 0.3 فیصد رہی، جو مارچ کے 0.7 فیصد سے کم تھی، تاہم مئی 2025 میں یہ شرح بڑھ کر 2.7 فیصد تک پہنچنے کی توقع ہے۔ یہ اضافہ بنیادی اثر کے زوال اور قیمتوں کے معمول پر آنے کی علامت ہے۔
مالی سال 2024-25 کے ابتدائی گیارہ ماہ کے دوران اوسط مہنگائی 4.7 فیصد رہنے کا امکان ہے، جو گزشتہ سال کے 24.9 فیصد کے مقابلے میں نمایاں کمی کو ظاہر کرتا ہے۔
رپورٹ کے مطابق، مئی 2025 میں خوراک کی قیمتوں میں 1.4 فیصد سالانہ اضافہ متوقع ہے، جبکہ رہائش، بجلی و گیس کے نرخوں میں 3.3 فیصد کمی کا امکان ہے، جس کی بنیادی وجہ بجلی کے نرخوں میں حالیہ کمی ہے۔ اپریل میں بنیادی مہنگائی کی شرح تقریباً 9 فیصد رہنے کی پیش گوئی کی گئی ہے۔
اسٹیٹ بینک آف پاکستان نے حالیہ مانیٹری پالیسی اجلاس میں شرح سود 1 فیصد کم کر کے 11 فیصد مقرر کی، جو جاری مالیاتی نرمی کے سلسلے میں ساتویں کمی ہے۔ اب تک شرح سود میں مجموعی طور پر 11 فیصد کی کمی کی جا چکی ہے۔
جے ایس گلوبل نے عندیہ دیا ہے کہ اگر مہنگائی کی موجودہ رفتار برقرار رہی تو آئندہ پالیسی اجلاس میں شرح سود میں مزید کمی ممکن ہے۔ اگلا اجلاس 16 جون 2025 کو متوقع ہے۔
