پشاور میں فیڈرل کانسٹیبل ری ہیڈکوارٹرز کو نشانہ بنانے کی ایک سنگین کوشش قانون نافذ کرنے والے اداروں نے بروقت کارروائی کرتے ہوئے ناکام بنا دی۔ تخریبی کارروائی کے دوران تین شدت پسند ہلاک ہوئے، جبکہ مقابلے میں فیڈرل کانسٹیبل ری کے تین جوان جامِ شہادت حاصل کر گئے۔
سی سی پی او پشاور ڈاکٹر میاں سعید کے مطابق صبح تقریباً 8 بج کر 10 منٹ پر تین خودکش حملہ آوروں نے ہیڈکوارٹرز پر حملہ کیا۔ ایک حملہ آور نے مرکزی دروازے کے قریب خود کو دھماکے سے اڑا دیا، جب کہ دو دیگر داخلی حصے تک پہنچنے میں کامیاب ہوئے۔
ترجمان کے مطابق اندر داخل ہونے والے دونوں حملہ آوروں کا فیڈرل کانسٹیبل ری کے اہلکاروں نے بہادری سے مقابلہ کیا اور فائرنگ کے تبادلے میں دونوں ہلاک کر دیے گئے۔ حکام کا کہنا ہے کہ تینوں خودکش حملہ آوروں کا خاتمہ ہو چکا ہے اور عمارت کا کلیئرنس آپریشن مکمل کر لیا گیا ہے۔
واقعے میں دو خودکش دھماکوں کے نتیجے میں فیڈرل کانسٹیبل ری کے تین اہلکار شہید اور دو زخمی ہوئے۔ ڈپٹی کمانڈنٹ جاوید اقبال نے بتایا کہ جوانوں نے نہایت دلیری کے ساتھ حملہ آوروں کا سامنا کیا اور انہیں اپنے مقصد میں کامیاب نہیں ہونے دیا۔
حملے کے فوری بعد قانون نافذ کرنے والے اداروں نے علاقے کو گھیرے میں لے لیا، جبکہ امدادی ٹیمیں اور پولیس کی بھاری نفری جائے وقوعہ پر پہنچ کر امدادی کاموں میں مصروف ہوگئیں۔
