بدھ کے روز اسلام آباد کے پاکستان انسٹی ٹیوٹ آف میڈیکل سائنسز (پی آئی ایم ایس) میں آتشزدگی سے جاں بحق ہونے والے 14 نومولود بچوں میں دو ماہ کا ایک بچہ بھی شامل تھا، جو پیدائش کے بعد سے اسپتال میں لاوارث پڑا تھا اور اپنی موت تک دیگر بیمار بچوں کے درمیان وہیں رہ رہا تھا۔ اس کی لاش اب بھی اسپتال کے مردہ خانے میں موجود ہے۔
پی آئی ایم ایس کی ایک خاتون ڈاکٹر نے نام ظاہر نہ کرنے کی شرط پر بتایا کہ بچے کی پیدائش 21 جون کو ایک ایسی لڑکی کے ہاں ہوئی تھی جس کی عمر تقریباً 15 سال بتائی جاتی ہے۔ لڑکی کے پاس اپنی شادی کا ثبوت فراہم کرنے کے لیے ضروری دستاویزات موجود نہیں تھیں۔ ڈاکٹر کے مطابق اسپتال کے عملے نے اس کے شوہر اور دادی سے شادی کا ثبوت فراہم کرنے کو کہا، لیکن جب وہ یہ ثبوت پیش نہ کرسکے تو بچے کو اسپتال میں چھوڑ کر چلے گئے اور دوبارہ واپس نہیں آئے۔
ڈاکٹر نے بتایا کہ پولیس پیدائش کے وقت سے ہی اس معاملے میں شامل تھی اور شادی کا ثبوت فراہم کیے بغیر بچے کو خاندان کے حوالے کرنے سے انکار کردیا تھا۔ یہ معاملہ طبی و قانونی کارروائی کے لیے باقاعدہ طور پر رپورٹ بھی کیا گیا تھا۔ ڈاکٹر نے کہا، ’’دو ماہ گزر گئے اور بچہ بیمار بچوں کے درمیان زچہ و بچہ صحت کے شعبے کی نرسری میں پرورش پاتا رہا۔‘‘
ایک اور ڈاکٹر نے بتایا کہ نومولود نے اپنی مختصر زندگی ایسے ماحول میں گزاری جہاں انفیکشن کا خطرہ بہت زیادہ تھا اور اسے معمول کی ذہنی اور اعصابی نشوونما کے لیے ضروری نگہداشت بھی حاصل نہیں ہوسکی۔ انہوں نے کہا، ’’ہر بچے کو شناخت، شہریت اور خاندان کا حق حاصل ہے تاکہ وہ معاشرے کا ایک صحت مند فرد بن سکے۔ اس بچے کو عطیات کے ذریعے خوراک اور لباس فراہم کیا جاتا رہا۔‘‘
انہوں نے مزید بتایا کہ اسپتال کے عملے نے بچے کو گود دینے کے عمل میں سہولت فراہم کرنے کی ہر ممکن کوشش کی، تاہم پولیس نے دو ماہ کے دوران اس معاملے پر مزید کارروائی نہیں کی۔ اسپتال کے ریکارڈ میں بچے کا نام صرف ’’بچہِ ح‘‘ درج تھا، تاہم عملے نے غیر رسمی طور پر اسے علی کا نام دیا تھا۔
ڈاکٹر نے کہا، ’’اب اس کی لاش مردہ خانے میں ہے۔ صرف اس کے قانونی وارث ہی لاش وصول کرسکتے ہیں۔‘‘
پی آئی ایم ایس میں آتشزدگی
بدھ کے روز پی آئی ایم ایس کے زچہ و بچہ صحت کے شعبے میں آگ لگنے کے بعد 14 نومولود بچے جاں بحق ہوگئے۔ وزیر صحت نے کہا کہ آگ ایئر کنڈیشننگ یونٹ میں پیدا ہونے والی چنگاری سے لگی، جبکہ غم زدہ خاندانوں کا کہنا تھا کہ امدادی ٹیمیں بہت دیر سے پہنچیں۔
اسپتال کے ایک بیان کے مطابق آگ صبح 6 بج کر 38 منٹ پر نرسری کے اندر پیدا ہونے والی چنگاری سے شروع ہوئی اور ہر انکیوبیٹر کے قریب موجود آکسیجن پوائنٹس کے باعث چند ہی سیکنڈ میں شدید آگ میں تبدیل ہوگئی۔
نرسری میں ڈیوٹی پر موجود دو ڈاکٹروں اور دو نرسوں نے فوری طور پر کارروائی کی اور سکیورٹی عملے کو مدد کے لیے بلایا۔ سکیورٹی اہلکاروں نے بچوں کو نکالنے کے لیے دو مرتبہ اندر جانے کی کوشش کی، تاہم صبح 6 بج کر 39 منٹ پر ایک زوردار دھماکا ہوا جس کے نتیجے میں چھت گر گئی۔
کئی عینی شاہدین، جن کے ہاتھ اور چہرے دھویں سے سیاہ ہوگئے تھے، نے فرانسیسی خبر رساں ادارے کو بتایا کہ وہ کئی گھنٹوں تک ہنگامی امدادی خدمات کا انتظار کرتے رہے اور بعض دروازے بند ملنے کے بعد وارڈ تک پہنچنے کے لیے کھڑکیاں توڑنا پڑیں۔ تاہم اسپتال اور حکومت نے بعد میں اس مؤقف کی تردید کردی۔
وزیراعظم شہباز شریف نے فوری طور پر ایک تحقیقاتی کمیٹی تشکیل دی اور وفاقی سیکریٹری صحت محمد اسلم غوری کو ان کے عہدے سے ہٹا دیا۔ دوسری جانب اسلام آباد کے ضلعی مجسٹریٹ کی جانب سے جاری کردہ نوٹیفکیشن میں سات رکنی حقائق معلوم کرنے والی کمیٹی کی تشکیل کی بھی تصدیق کی گئی، جس کی سربراہی ایڈیشنل ڈپٹی کمشنر جنرل کو سونپی گئی ہے۔ کمیٹی کا مقصد آتشزدگی کے پس پردہ حقائق کا تعین کرنا ہے۔
اسلام آباد میں صحافیوں سے گفتگو کرتے ہوئے وزیر صحت نے کہا کہ وہ احتساب کے لیے اپنے اعلیٰ حکام کے سامنے پیش ہوں گے۔ انہوں نے بتایا کہ واقعے کی تحقیقات ماہرین اور متعدد ادارے کررہے ہیں اور یقین دلایا کہ ’’کچھ بھی پوشیدہ نہیں رہے گا اور تمام حقائق سامنے لائے جائیں گے۔‘‘
اس واقعے نے سیاسی سطح پر بھی شدید غم و غصے کو جنم دیا ہے، جبکہ ہر جانب سے ذمہ داروں کے احتساب اور اسپتال انتظامیہ کے خلاف سخت کارروائی کے مطالبات سامنے آرہے ہیں۔
