آصف علی زرداری نے کہا ہے کہ پاکستان کو اس بات پر فخر ہے کہ اس نے دانشمندانہ حکمت عملی، مضبوط عزم اور امن کے لیے ثابت قدم قیادت کا مظاہرہ کیا۔
اسلام آباد سے جاری اپنے بیان میں انہوں نے امریکا اور ایران کے درمیان خلیجی کشیدگی کے تناظر میں ہونے والی جنگ بندی کو مثبت اور بروقت پیش رفت قرار دیا۔
ان کے مطابق یہ اقدام خطے میں مکالمے، برداشت اور استحکام کو فروغ دینے کے لیے نہایت اہم ہے، جبکہ پاکستان نے مسلسل نیک نیتی کے ساتھ کشیدگی کم کرنے میں فعال کردار ادا کیا۔
صدر نے کہا کہ یہ تمام کوششیں خطے کے امن اور انسانیت کے تحفظ کے لیے کی گئیں، خاص طور پر ایسے وقت میں جب صورتحال سنگین تباہی کی طرف بڑھ رہی تھی۔ انہوں نے اس امر پر بھی اطمینان ظاہر کیا کہ پاکستان نے امن کے فروغ میں سنجیدہ اور ذمہ دارانہ قیادت پیش کی۔
انہوں نے عالمی سطح پر مختلف قیادتوں کے کردار کو سراہتے ہوئے شہباز شریف، عاصم منیر اور اسحاق ڈار کی مسلسل کاوشوں کو قابلِ تحسین قرار دیا۔
مزید برآں، صدر نے چین، سعودی عرب، ترکی، قطر، مصر اور دیگر خلیجی ممالک کا شکریہ ادا کرتے ہوئے اس بات پر زور دیا کہ جنگ بندی کو مستقل مذاکرات، باہمی اعتماد اور پرامن حل کی طرف بڑھایا جانا چاہیے۔
