پاکستان تحریک انصاف (پی ٹی آئی) کے چیئرمین بیرسٹر گوہر خان نے کہا ہے کہ مخالفین کے ساتھ کوئی دشمنی نہیں، صلح صفائی بہتر ہے، لیکن اگر حکومت ایک ہاتھ سے بات کرے اور دوسرے سے سختی کرے تو حالات بہتر نہیں ہوں گے۔ انہوں نے واضح کیا کہ فی الحال اسٹیبلشمنٹ سے کوئی رابطہ نہیں ہے، اور اگر ہوا تو اسے چھپایا نہیں جائے گا۔
راولپنڈی میں نجی ہاؤسنگ سوسائٹی پر میڈیا سے گفتگو کرتے ہوئے بیرسٹر گوہر نے بتایا کہ وہ چیف جسٹس آف پاکستان سے ملاقات کے لیے تین گھنٹے انتظار کر رہے تھے، تاکہ بانی پی ٹی آئی اور ان کی بہنوں سے قانونی اور آئینی حق کے تحت ملاقات ہو سکے۔
انہوں نے کہا کہ خیبرپختونخوا میں پی ٹی آئی حکومت پر غیر منصفانہ الزامات نہیں لگنے چاہئیں اور جو لوگ الزامات لگائیں، وہ ثبوت بھی پیش کریں۔ مقدمات کے حوالے سے انہوں نے کہا کہ بانی پی ٹی آئی اور بشریٰ بی بی کو ابھی تک ضمانت نہیں ملی، اور عدلیہ سے اپیل کی کہ انصاف بروقت عوام کو پہنچایا جائے تاکہ لوگ قانون ہاتھ میں نہ لیں۔
چیئرمین پی ٹی آئی نے پارٹی کے اندرونی معاملات میں عوامی بیان دینے سے گریز کیا، لیکن کہا کہ پی ٹی آئی ملک، افواج اور ریاست کے ساتھ کھڑی ہے اور احتجاج پرامن ہوگا۔ انہوں نے حکومت پر زور دیا کہ اگر دونوں ہاتھ ملائے جائیں تو مسائل حل ہوں گے، بصورت دیگر احتجاج جاری رہے گا۔
گوہر خان نے اعلان کیا کہ 8 فروری کو پارٹی علامتی احتجاج ریکارڈ کرے گی، اور پی ٹی آئی کا وجود بانی کے نشان کے بغیر بھی واضح ہے۔ انہوں نے اپوزیشن لیڈرز کے نوٹیفکیشن کو مثبت قرار دیا اور کہا کہ یہ ایوان اور جمہوریت کے لیے اچھا اقدام ہے۔
