وزیراعظم شہباز شریف اور آرمی چیف جنرل عاصم منیر سے امریکی کمپنیوں کے ایک اعلیٰ سطحی وفد نے ملاقات کی۔
ملاقات کے دوران امریکی کمپنیوں نے ابتدائی طور پر پاکستان میں مختلف شعبوں میں 50 کروڑ ڈالر کی سرمایہ کاری کرنے کا اعلان کیا۔
وزیراعظم ہاؤس کی جانب سے جاری اعلامیے کے مطابق پاکستان سے سونا، تانبہ اور دیگر معدنیات برآمد ہوں گی جبکہ ایک امریکی کمپنی پاکستان میں جدید کثیر دھاتی ریفائنری قائم کرے گی۔
اعلامیے میں کہا گیا کہ یہ معاہدہ روزگار کے نئے مواقع، ٹیکنالوجی کی منتقلی اور پائیدار ترقی کو یقینی بنائے گا جبکہ امریکی کمپنیاں پاکستان کے ساتھ طویل المدتی شراکت داری چاہتی ہیں۔
مزید بتایا گیا کہ وفد میں شامل کمپنیوں نے کان کنی اور انفرااسٹرکچر کے شعبوں میں سرمایہ کاری میں دلچسپی ظاہر کی۔
اس موقع پر ایف ڈبلیو او اور امریکی کمپنی کے درمیان اہم معدنیات پر تاریخی معاہدہ ہوا اور امریکی کمپنیوں کو پاکستان کے سونے، تانبے اور دیگر معدنی ذخائر سے متعلق بریفنگ دی گئی۔
اسی طرح این ایل سی اور ایک امریکی کمپنی کے مابین لاجسٹک اور تعمیرات سے متعلق مفاہمتی یادداشت پر دستخط کیے گئے۔
ملاقات میں نائب وزیراعظم اسحاق ڈار اور دیگر وفاقی وزراء بھی شریک تھے۔
