امریکا نے ہفتے کے دن پاکستان کو پیشکش کی ہے کہ وہ پاکستان اور بھارت کے درمیان تعمیری مذاکرات شروع کرنے میں مدد فراہم کرے تاکہ مستقبل میں کسی بھی قسم کے تنازع سے بچا جا سکے۔ یہ پیشکش اس وقت کی گئی جب پاکستان نے بھارت کے میزائل حملوں کے جواب میں جوابی کارروائی کی۔
امریکی محکمہ خارجہ کی ترجمان بروس نے اپنے بیان میں کہا کہ امریکی وزیر خارجہ مارکو روبیو نے آج آرمی چیف جنرل عاصم منیر سے ٹیلیفونک رابطہ کیا ہے۔
بیان کے مطابق، وزیر خارجہ نے دونوں ملکوں پر زور دیا کہ وہ کشیدگی کم کرنے کے طریقے تلاش کریں اور امریکا کی طرف سے تعمیری مذاکرات شروع کرنے کی پیشکش کی گئی ہے تاکہ مستقبل میں تصادم سے بچا جا سکے۔
ہفتے کی صبح پاکستان نے بھارت کے میزائل حملوں کے جواب میں جوابی حملہ کیا۔ اس کارروائی کو پاکستان نے ’آپریشن بنیان المرصوص‘ کا نام دیا ہے۔ اس آپریشن میں استعمال ہونے والے الفتح میزائلوں کے نام ان بچوں کے نام پر رکھے گئے ہیں جو بھارتی میزائل حملوں میں شہید ہوئے۔
