ویسٹ انڈیز نے 33 سال بعد پاکستان کو ایک روزہ سیریز میں شکست دے دی، برائن لارا اسٹیڈیم میں کھیلے گئے فیصلہ کن تیسرے ون ڈے میں میزبان ٹیم نے گرین شرٹس کو 202 رنز سے مات دی۔
پاکستانی ٹیم 295 رنز کے ہدف کے تعاقب میں صرف 92 رنز پر ڈھیر ہو گئی۔ ویسٹ انڈیز کے جیڈن سیلز نے شاندار بولنگ کرتے ہوئے محض 18 رنز کے عوض 6 کھلاڑیوں کو پویلین کی راہ دکھائی۔ صائم ایوب، عبداللّٰہ شفیق، محمد رضوان، حسن علی اور ابرار احمد بغیر کوئی رن بنائے آؤٹ ہوئے، جبکہ محمد نواز 23 رنز بنا کر ناٹ آؤٹ رہے۔ نسیم شاہ نے 6 اور حسین طلعت نے ایک رن اسکور کیا۔ گوڈاکیش موتی نے 2 اور روسٹن چیز نے ایک وکٹ حاصل کی۔
اس سے قبل پاکستان نے ٹاس جیت کر پہلے فیلڈنگ کا فیصلہ کیا۔ ویسٹ انڈیز نے مقررہ 50 اوورز میں 6 وکٹوں کے نقصان پر 294 رنز بنائے۔ کپتان شائی ہوپ نے مشکل صورتحال میں شاندار بیٹنگ کرتے ہوئے 94 گیندوں پر ناقابل شکست 120 رنز بنائے، جبکہ جسٹن گرویوز نے 24 گیندوں پر 43 رنز کی دھواں دار اننگز کھیلی۔ ایون لیوئس نے 37 اور روسٹن چیز نے 36 رنز بنائے۔
پاکستان کی جانب سے نسیم شاہ اور ابرار احمد نے دو دو وکٹیں لیں، جبکہ محمد نواز اور صائم ایوب کے حصے میں ایک ایک وکٹ آئی۔ ٹیم میں ایک تبدیلی کی گئی، شاہین شاہ آفریدی کی جگہ نسیم شاہ کو شامل کیا گیا۔
