اسلام آباد: وزیراعظم شہباز شریف نے بجلی کی تقسیم کار کمپنیوں (ڈسکوز) کی نجکاری میں عالمی معیار کے سرمایہ کاروں کی بھرپور شرکت یقینی بنانے کے لیے مؤثر اور جامع حکمت عملی اختیار کرنے کی ہدایت جاری کر دی ہے۔
بدھ کے روز ڈسکوز کی نجکاری کے عمل اور نجکاری کمیشن کی ادارہ جاتی تنظیمِ نو سے متعلق جائزہ اجلاس کی صدارت کرتے ہوئے وزیراعظم نے ہدایت کی کہ جاری ادارہ جاتی اصلاحات اور نجکاری کمیشن کی تنظیمِ نو کا عمل ایک ماہ کے اندر مکمل کیا جائے۔
وزیراعظم نے ملکی اور بین الاقوامی سطح پر سرمایہ کاروں کو متوجہ کرنے کے لیے منعقد کیے گئے روڈ شوز پر اطمینان کا اظہار کرتے ہوئے کہا کہ نجکاری کے تمام مراحل مقررہ مدت میں، قواعد و ضوابط اور بین الاقوامی بہترین طریقۂ کار کے مطابق مکمل کیے جائیں تاکہ حکومت کو زیادہ سے زیادہ مالی فائدہ حاصل ہو۔
انہوں نے ہدایت کی کہ نجکاری کمیشن کی استعدادِ کار بڑھانے کے لیے مالیات، قانون اور اطلاعاتی ٹیکنالوجی کے شعبوں میں عالمی معیار کے ماہرین بھرتی کیے جائیں۔ وزیراعظم کے مطابق پیشہ ور اور بین الاقوامی معیار کی ٹیم نہ صرف کمیشن کی صلاحیت میں اضافہ کرے گی بلکہ سرکاری اداروں میں سرمایہ کاری کے مزید مواقع بھی پیدا کرے گی۔
شہباز شریف نے مزید ہدایت کی کہ نجکاری کے تمام مراحل میں اعلیٰ ترین پیشہ ورانہ مہارت رکھنے والے مشیروں کی سفارشات کو شامل کیا جائے، جبکہ اس عمل کے لیے درکار تمام قانونی انتظامات اور مالیاتی ضابطہ جاتی فریم ورک بروقت مکمل کیے جائیں۔
وزیراعظم نے اس بات پر زور دیا کہ نجکاری کے پورے عمل میں صارفین کے مفادات کو اولین ترجیح دی جائے۔ انہوں نے ہدایت کی کہ نجکاری کے بعد کمپنیوں میں صارفین کی شکایات کے فوری ازالے کے لیے ایک جامع اور مؤثر نظام بھی قائم کیا جائے۔
اجلاس کے دوران نجکاری کمیشن نے شرکاء کو ڈسکوز کی نجکاری کے پہلے مرحلے کی تکمیل کے لیے اب تک کیے گئے اقدامات پر تفصیلی بریفنگ بھی دی۔
