لاہور: وزیراعلیٰ پنجاب مریم نواز شریف نے بوتل بند پینے کے پانی پر ٹیکس یا کسی قسم کی فیس عائد کرنے کی ابتدائی تجویز مسترد کرتے ہوئے واضح کیا ہے کہ صاف اور محفوظ پینے کا پانی ہر شہری کا بنیادی حق ہے اور اسے عوامی خدمت کے طور پر فراہم کیا جانا چاہیے۔
صوبے کے مختلف اضلاع میں 864 واٹر فلٹریشن پلانٹس کی تعمیر کا آغاز ہو چکا ہے، جبکہ مزید 1,913 فلٹریشن پلانٹس پر جلد کام شروع کیا جائے گا۔ اسی دوران جاری آزمائشی منصوبے کے تحت چار اضلاع میں روزانہ 19 لیٹر کے 10 ہزار صاف پانی کے کین شہریوں کو مفت فراہم کیے جا رہے ہیں۔
پنجاب صاف پانی اتھارٹی کے خصوصی اجلاس کی صدارت کرتے ہوئے وزیراعلیٰ نے بوتل بند پانی کے منصوبے پر پیش رفت کا جائزہ لیا اور ہدایت کی کہ چاروں اضلاع کی روزانہ کی پیش رفت سے متعلق رپورٹ پیش کی جائے۔ انہوں نے بہاولپور، رحیم یار خان اور خوشاب کے ڈپٹی کمشنرز کو ہدایت کی کہ عوامی رائے حاصل کی جائے اور صاف پانی کی روزانہ طلب کا بھی جائزہ لیا جائے۔
اجلاس میں گھروں تک واٹر ٹینکروں کے ذریعے صاف پانی کی فراہمی کی تجاویز پر بھی غور کیا گیا۔ وزیراعلیٰ نے ہدایت کی کہ پنجاب بھر میں 1,886 واٹر فلٹریشن پلانٹس کے منصوبے جلد از جلد مکمل کیے جائیں۔
اجلاس کو بتایا گیا کہ صوبے میں 670 بوتل بند پانی کے پلانٹس قائم کرنے کی تجویز بھی زیر غور ہے، جن میں 335 پلانٹس یومیہ 5 ہزار لیٹر اور 335 پلانٹس یومیہ 10 ہزار لیٹر پانی تیار کرنے کی صلاحیت رکھتے ہوں گے۔ اس کے علاوہ بوتل بند پانی کی فراہمی کے لیے 4,020 تقسیم مراکز قائم کرنے کی تجویز بھی پیش کی گئی۔
اجلاس کو بتایا گیا کہ اس وقت خوشاب میں روزانہ 860، رحیم یار خان میں 780، ڈیرہ غازی خان کے کوہِ سلیمان کے دور دراز علاقوں میں 1,500 اور بہاولپور کے دور افتادہ علاقوں میں 2,780 بوتلیں صاف پانی کی فراہم کی جا رہی ہیں۔
وزیراعلیٰ نے ہدایت کی کہ صاف پانی کی ترسیل کے لیے استعمال ہونے والے ٹرکوں کی تعداد میں اضافہ کیا جائے تاکہ فراہمی کا سلسلہ بلا تعطل جاری رہے۔ انہوں نے کہا کہ گھروں کی دہلیز تک صاف پانی پہنچانا ان کا ذاتی عزم ہے اور پنجاب کے ہر شہری کو محفوظ پینے کے پانی تک رسائی حاصل ہونی چاہیے۔
مریم نواز شریف نے کہا کہ خواتین اور بزرگوں کو سروں پر پانی اٹھا کر لاتے دیکھنا انتہائی تکلیف دہ ہے، جبکہ یہ بھی افسوسناک ہے کہ صوبے میں متعدد پینے کے پانی کے منصوبے غیر فعال پڑے ہیں۔ انہوں نے کہا کہ اب وقت آ گیا ہے کہ دور دراز علاقوں کے لوگوں کو شدید گرمی میں میلوں دور جا کر پانی لانے کی مشقت سے نجات دلائی جائے۔
انہوں نے کہا کہ “اللہ تعالیٰ کے فضل سے ہم نے مختصر مدت میں گھروں تک صاف پینے کا پانی پہنچانے کا نظام قائم کر دیا ہے۔ صاف بوتل بند پانی کے منصوبے کے تحت روزانہ لاکھوں لیٹر پانی عزت و وقار کے ساتھ عوام کی دہلیز تک پہنچایا جا رہا ہے۔ صاف پینے کا پانی صرف ایک عوامی سہولت نہیں بلکہ عوام کی صحت، آسائش اور وقار کی مضبوط ضمانت ہے۔”
