وزارت خزانہ نے جمعہ کے روز وفاقی حکومت کے ملازمین کے لیے 10 فیصد ایڈہاک ریلیف الاؤنس 2025 اور 30 فیصد ڈسپیرٹی ریڈکشن الاؤنس کی منظوری کا باقاعدہ نوٹیفکیشن جاری کر دیا۔
جاری کردہ دفتر یادداشت میں کہا گیا ہے کہ صدرِ پاکستان نے یکم جولائی 2025 سے تاحکمِ ثانی مسلح افواج، سول آرمڈ فورسز، وفاقی سول ملازمین، دفاعی بجٹ سے تنخواہ لینے والے سویلینز، اور معیاری معاہدہ شرائط پر بھرتی ہونے والے کنٹریکٹ ملازمین کے لیے بنیادی تنخواہ پر 10 فیصد ایڈہاک ریلیف الاؤنس کی منظوری دی ہے۔
“بنیادی تنخواہ” میں وہ پرسنل پے بھی شامل ہوگی جو سالانہ انکریمنٹ کی زیادہ سے زیادہ حد سے بڑھنے پر دی گئی ہو۔
یہ الاؤنس متعلقہ وزارتوں، ڈویژنز و محکموں کو مالی سال 2025-26 کے مختص بجٹ سے دیا جائے گا، اور اس مقصد کے لیے کوئی اضافی گرانٹ نہیں دی جائے گی۔
ایک الگ یادداشت میں صدر نے 1 جولائی 2025 سے بی پی ایس 1 تا 22 کے اُن ملازمین کو، جو پہلے سے ڈسپیرٹی الاؤنس حاصل کر رہے ہیں، 30 فیصد الاؤنس بنیادی تنخواہ (30 جون 2022 کے مطابق) پر جاری رکھنے کی منظوری دی ہے۔
جو ملازمین 1 جولائی 2022 کے بعد بھرتی ہوئے ہیں، اُنہیں یہ الاؤنس 2017 کے متعلقہ ابتدائی بنیادی پے اسکیل کی بنیاد پر ملے گا۔
ملازمین نے مہنگائی کے تناظر میں تنخواہوں میں مناسب اضافہ کرنے کا مطالبہ بھی کیا ہے۔
