سینئر وزیر پنجاب مریم اورنگزیب نے اعلان کیا ہے کہ وزیراعلیٰ مریم نواز نے پنجاب بھر میں پالتو شیر رکھنے کی قانونی اجازت ختم کرنے کا فیصلہ کیا ہے۔
ان کے مطابق یہ اقدام 8 سالہ بچے واجد کے بازو ضائع ہونے کے افسوسناک واقعے کے نوٹس کے بعد کیا گیا۔ وزیراعلیٰ کی ہدایت پر ننھے واجد کو اسپتال منتقل کیا گیا اور جدید بائیونک آرم لگانے کی ہدایات دی گئی ہیں۔
وزیراعلیٰ نے واقعے کو چھپانے اور مقامی اسپتال میں بازو کاٹے جانے کے واقعے پر سخت کارروائی کی ہدایت کی، ساتھ ہی بچے اور اس کے والدین کے لیے مکمل طبی دیکھ بھال کا بھی حکم دیا۔
مریم اورنگزیب نے بتایا کہ ڈولا بریڈنگ فارم میں ہونے والے حادثے کی اطلاع فارم ہاؤس کے مالک نے پولیس یا محکمہ جنگلی حیات کو نہیں دی تھی۔ بعد ازاں پولیس اور وائلڈ لائف ڈپارٹمنٹ نے ملزمان کو گرفتار کر کے ایف آئی آر درج کی۔
سینئر وزیر نے کہا کہ پرائیویٹ اسپتال نے بچے کے زخم کی اصل وجہ چھپائی اور فارم ہاؤس کے مالک نے والدین کو بھی جھوٹی کہانی سنانے پر مجبور کیا۔
انہوں نے واضح کیا کہ پنجاب وائلڈ لائف ایکٹ کے تحت پالتو جنگلی بلیوں کے لیے مخصوص لائسنس جاری کیے جاتے ہیں، لیکن وزیراعلیٰ مریم نواز کی ہدایت پر اب وائلڈ کیٹس رکھنے کی شق ختم کر دی گئی ہے۔
